စစ်အာဏာရှင်ဆန့်ကျင်ရေး ပြည်သူလူထုခုခံစစ်စတင်ရန် ကြေညာပြီးသုံးရက်အတွင်း စစ်ကောင်စီကို ပစ်မှတ်ထားတိုက်ခိုက်မှု ၆၄ကြိမ်ရှိသည်ဟု မန္တလေးတိုင်းပြည်သူ့ကာကွယ်ရေးတပ်မတော်က ထုတ်ပြန်သည်။
အမျိုးသားညီညွတ်ရေးအစိုးရက စက်တင်ဘာ၇ ရက်တွင် အရေးပေါ်အခြေအနေ ကြေညာခဲ့ချိန်မှစ၍ စစ်ကောင်စီကို တုံ့ပြန်တိုက်ခိုက်သော လှုပ်ရှားမှုများအား မန္တလေးတိုင်းဒေသကြီး အနှံ့အပြားတွင် အဆက်မပြတ် အကောင်အထည်ဖော် ဆောင်ရွက်ခဲ့ခြင်းဖြစ်သည်ဟု ဖော်ပြထားသည်။
စက်တင်ဘာ၇ရက်မှ ၉ရက်အတွင်း ထိတွေ့တိုက်ပွဲဖော်ဆောင်မှု ၆၄ကြိမ်ရှိခဲ့ပြီး စစ်ကောင်စီဘက်မှ သေဆုံးမှုနှင့် ထိခိုက်ဒဏ်ရာရမှုများစွာ ရှိခဲ့သည်ဟု ဆိုသည်။
မန္တလေးတိုင်းအတွင်း စစ်ဆင်ရေးပြီးမြောက်သည့် အခြေအနေပြ ဇယားကိုလည်း ဖော်ပြခဲ့ရာ မန္တလေး၊ ကျောက်ဆည်၊ စဉ့်ကူး၊ မတ္တရာ၊ မြင်းခြံ၊ မြင်းခြံခရိုင်များ၌ စစ်ဆင်ရေးပြုလုပ်ခဲ့သည်ဟု ဆိုသည်။
Public Service Announcement
စုစုပေါင်း တိုက်ခိုက်မှု ၆၄ကြိမ်ရှိရာ ခန်းမတစ်ကြိမ်၊ Mytel တာဝါတိုင်သုံးကြိမ်၊ ရဲ/ရဲစခန်း ရှစ်ကြိမ်၊ အထိုင်ကင်း/လှည့်ကင်း ၂၆ကြိမ်၊ အုပ်ချုပ်ရေး ယန္တရား ၂၆ ကြိမ်တို့ ဖြစ်သည် ဖော်ပြထားသည်။
ထိုသို့ တိုက်ခိုက်ရာတွင် ဗုံးအသုံးပြုမှု ၈၀ရာခိုင်နှုန်းရှိပြီး သေနတ်အသုံးပြုမှု ၁၄ရာခိုင်နှုန်းရှိသည်ဟုလည်း ထုတ်ပြန်ခဲ့သည်။
အမျိုးသားညီညွတ်ရေးအစိုးရ၏ လမ်းညွှန်မှုများနှင့်အတူ စစ်အာဏာရှင်နိဂုံးချုပ်သည့်အထိ ပြည်သူလူထုကို ကာကွယ်ပြီး စစ်ကောင်စီကို တိုက်ခိုက်ချေမှုန်းသွားမည်ဟုလည်း ကြေညာခဲ့သည်။
