အာဏာသိမ်းယူခြင်းမဟုတ်ဘဲ ထိန်းသိမ်းတာလို့အာဏာသိမ်းစစ်ကောင်စီက သံတမန်တွေကို ခေါ်​ရှင်း

လက်ရှိအခြေအနေဟာ အကြမ်းဖက်စစ်တပ်က အာဏာသိမ်းယူခြင်းမဟုတ်ဘဲ နိုင်ငံတော်ရဲ့အာဏာအရပ်ရပ်ကို ထိန်းသိမ်းဆောင်ရွက်နေခြင်းဖြစ်တယ်လို့ စစ်ကောင်စီရဲ့လက်အောက်ခံ ပြန်ကြားရေးဝန်ကြီးက နိုင်ငံတကာသံတမန်တွေကို မနေ့က ဖိတ်ခေါ်ရှင်းလင်းခဲ့ပါတယ်။

ကုလသမဂ္ဂနဲ့ ကမ္ဘာ့နိုင်ငံအများစုက ဖေဖော်ဝါရီ ၁ ရက်မှာ စစ်တပ်က ရွေးကောက်ခံအစိုးရကို ဖယ်ရှားကာ နိုင်ငံ့ ခေါင်းဆောင်တွေကို ဖမ်းဆီးခဲ့မှုကို အာဏာသိမ်းမှုအဖြစ် ရှုမြင်လက်ခံထားချိန်မှာ အကြမ်းဖက်စစ်တပ်က အာဏာထိန်းခြင်းဖြစ်တယ်လို့ ပြောဆိုခဲ့တာဖြစ်ပါတယ်။

ကုလသမဂ္ဂအထွေထွေညီလာခံကျင်းပဖို့ နီးကပ်လာချိန်မှာ အကြမ်းဖက်စစ်ကောင်စီက သံတမန်တွေကို ရန်ကုန် မြို့၊ ပြည်လမ်းမှာရှိတဲ့ မြန်မာ့အသံနဲ့ ရုပ်မြင်သံကြားစတူဒီယိုမှာ ဖိတ်ခေါ်ရှင်းလင်းခဲ့တာပါ။

အဲဒီသံတမန်ရှင်းလင်းပွဲကို မြောက်ကိုရီးယား၊ အစ္စရေး၊ ထိုင်း၊ ကမ္ဘောဒီးယား၊ အီဂျစ် နိုင်ငံ ၅ နိုင်ငံသာ သံအမတ်ကြီးတွေ တက်ရောက်ခဲ့တာဖြစ်ပြီး ကျန်သံရုံးတွေကတော့ သံရုံးယာယီတာဝန်ခံတွေ၊ သံရုံးအကြီး အကဲတွေနဲ့၊ တာဝန်ရှိသူတွေ တက်ရောက်ခဲ့ပါတယ်။

Public Service Announcement

အမေရိကန်၊ ဗြိတိန်၊ ဥရောပသမဂ္ဂအဖွဲ့ဝင်နိုင်ငံတွေအပါအဝင် အနောက်နိုင်ငံအများစုက မတက်ရောက်ခဲ့ပါဘူး။

အကြမ်းဖက်စစ်တပ် အာဏာသိမ်းပြီး ၇ လကျော်လာချိန်အထိ ရုရှား၊ တရုတ်နဲ့ အာဆီယံအဖွဲ့ဝင်နိုင်ငံအချို့ကလွဲ လို့ ကုလသမဂ္ဂအပါအဝင် ကမ္ဘာ့နိုင်ငံအများစုက စစ်ကောင်စီကို အစိုးရတစ်ရပ်အဖြစ်လက်ခံအသိအမှတ်ပြုခြင်းမ ရှိသေးပါဘူး။