လှိုင်သာယာမြို့တော်ခန်းမနှင့် ထွေအုပ်ရုံးအနီး ဗုံးခြောက်လုံးပေါက်

-လှိုင်သာယာမှ လူငယ်၇၆ဦးကျဆုံးခဲ့သည့် ​ခြောက်လပြည့်အထိမ်းအမှတ်ဟုဆို

လှိုင်သာယာမြို့နယ်(အရှေ့) မြို့နယ်ခန်းမနှင့် ထွေအုပ်ရုံးအနီးတို့တွင် ဗုံးခြောက်လုံး ဖောက်ခွဲခဲ့ကြောင်း လှိုင်သာယာမြို့ပြပြောက်ကျားတပ်ဖွဲ့(CGF-HTY)က ယနေ့ထုတ်ပြန်သည်။

အာဏာသိမ်းစစ်ကောင်စီအား ခုခံစစ်ဖြစ်သည့် ဗုံးခွဲတိုက်ခိုက်မှုများကို ယနေ့(စက်တင်ဘာ ၁၄)ညနေ ၄ နာရီမှစတင်ကာ ကျန်စစ်သားလမ်းပေါ်ရှိ မြို့တော်ခန်းမအနီး ဗုံးသုံးလုံး ညောင်တုန်းလမ်းပေါ်ရှိ ထွေအုပ်ရုံးနှင့် ၅ ထိပ် ရဲစခန်းကြား ဗုံးသုံးလုံးဖြင့် ဗုံးခြောက်လုံးအား ဖေါက်ခွဲတိုက်ခိုက်ခဲ့သည်ဟု ထုတ်ပြန်ချက်တွင် ဖော်ပြသည်။

ထို့အပြင် ယနေ့(စက်တင်ဘာ ၁၄ ရက်)သည် နွေဦးတော် လှန်ရေး၌ပါဝင်သည့် လှိုင်သာယာမြို့နယ်မှ အနာဂတ်လူငယ် ၇၆ ဦး ကျဆုံးခဲ့ရသည့် ​ခြောက်လပြည့်နေလည်းဖြစ်ပြီး ယင်းကျဆုံးသူရဲကောင်းများအား ဂါရဝပြု အလေးပြုလိုက်ပါသည်ဟု CGF-HTY ၏ထုတ်ပြန်ချက်တွင် ထည့်သွင်းဖော်ပြထားသည်။

Public Service Announcement

အထက်ပါ ဗုံးဖောက်ခွဲတိုက်ခိုက်ခံရမှုကြောင့် လှိုင်သာယာ(အရှေ့)မြို့မရဲစခန်း၌ စစ်ကောင်စီတပ်များစုဝေးရောက်ရှိနေသည့်အပြင် ကျန်စစ်သားအိမ်ရာဘက်သွားသည့်လမ်းပိုင်းတွင်လည်း စစ်ဆေးမှုများလုပ် ဆောင်နေကြောင်း ဒေသခံများက ဆိုသည်။