မြန်မာစစ်တပ်က ​တွေ့ဆုံ​ဆွေး​နွေး​ရေးကို လိုလားခဲ့ခြင်းမရှိဘူးလို့ ကုလအထူးကိုယ်စားလှယ်​ပြော

မြန်မာပြည်သူတွေအကျိုးအတွက် အားလုံးပါဝင်တဲ့တွေ့ဆုံဆွေးနွေးရေးအတွက် အကြံပြုချက်တွေကို စစ်တပ်က လိုလားခဲ့ခြင်းမရှိဘူးလို့ ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာအထူးကိုယ်စားလှယ်က တွစ်တာမှာရေးသားဖော်ပြပါတယ်။

အထူးကိုယ်စားလှယ် Christine Schraner Burgener က “ပြည်သူတွေအကျိုးအတွက် အားလုံးပါဝင်တဲ့တွေ့ဆုံဆွေးနွေးရေး ကျွန်မရဲ့ အကြံပြုချက်တွေကို စစ်တပ်က လိုလိုလားလားမရှိခဲ့ပါဘူး။ အခြားသောပါဝင်ပတ်သက်သူတွေအနေနဲ့ အကြမ်းဖက်တဲ့နည်းလမ်းကလွဲပြီး အခြားရွေးချယ်မှု မရှိဘူးဆိုတဲ့ ခံစားချက်ကို တားဆီးနိုင်တဲ့ ငြိမ်းချမ်းစွာဖြေရှင်းရေး ဆန္ဒကင်းမဲ့နေတာကို ကျွန်မ စိတ်ကောင်းဖြစ်မိပါတယ်”လို့ ရေးသားခဲ့တာပါ။

ဒီနေ့မှာ ကုလသမဂ္ဂဌာနချုပ် နယူးယောက်မြို့မှာ (၇၆) ကြိမ်မြောက် အထွေထွေညီလာခံကို စတင်ကျင်းပမှာဖြစ်ပြီး ညီလာခံ မစတင်ခင်မှာပဲ အထူးကိုယ်စားလှယ်က အခုလိုတွစ်တာမှာ ရေးသားခဲ့တာဖြစ်ပါတယ်။

အမျိုးသားညီညွတ်ရေးအစိုးရ(NUG) ဟာ အကြမ်းဖက်စစ်ကောင်စီကို ပြည်သူ့ခုခံတော်လှန်စစ် စတင်ကြောင်း စက်တင်ဘာ ၇ ရက်မှာကြေညာခဲ့ပြီး ဒီမိုကရေစီလှုပ်ရှား မှုကြားဝင်ဆောင်ရွက် ပေးနိုင်ဖို့နဲ့ ရက်စက်ကြမ်းကြုတ်တဲ့ စစ်ကောင်စီရဲ့တိုက်ခိုက်မှုတွေကနေ မြန်မာပြည်သူ လူထုကို ကူညီကာကွယ်ပေးဖို့ နိုင်ငံတကာအသိုင်းအဝန်းကို အားကိုးလို့ မရတော့ဘူးလို့ NUG က မနေ့က ထုတ်ပြန်ခဲ့ပါတယ်။

Public Service Announcement