ဆောမြို့မှလမ်းတစ်လျှောက် ပစ်ခတ်၍ စစ်ကြောင်းဖြင့်လာသော အာဏာသိမ်းစစ်ကောင်စီတပ်ကို ဆော-ကံကြီး လမ်းပိုင်းတွင် ယနေ့(စက်တင်ဘာ ၁၆) ညနေ ၃ နာရီခွဲခန့်၌ PDF-SAW အထူးပြောက်ကျား မိုင်းအဖွဲ့ က မိုင်းခွဲ တိုက်ခိုက်ရာ စစ်ကောင်စီတပ် ၁၀ ဦးထက်မနည်း ထိခိုက် ဒဏ်ရာရရှိနိုင်ကြောင်း PDF-SAW က သတင်းထုတ်ပြန်သည်။
လမ်းဘေးဝဲယာတစ်လျှောက် ပစ်ခတ်၍ စစ်ကြောင်းဖြင့် လာသော အကြမ်းဖက်စစ်ကောင်စီတပ်အင်အား ၁၀၀ ခန့်ရှိပြီး မိုင်းခွဲတိုက်ခိုက်မှုကြောင့် အရေအတွက်အတိ အကျကို အတည်မပြုနိုင်သော်လည်း စစ်ကောင်စီတပ် ၁၀ ဦးထက်မနည်း ထိခိုက်ဒဏ်ရာရမှု ရှိနိုင်ပြီး၊
PDF-SAW တပ်ဖွဲ့မှ ထိခိုက်မှု တစုံတရာမရှိဘဲ ပြန်လည်ဆုတ်ခွာနိုင်ခဲ့ကြောင်းထုတ်ပြန်ချက်တွင်ဖော်ပြထားသည်။
ဆက်လက်၍ PDF-SAW က ၎င်းတို့ သတိပေးကြေငြာထားသည့် လမ်းပိုင်းများအတွင်း (Accidents) အချိန်မရွေး ထိတွေ့မှု တိုက်ခိုက်မှုများ ရှိနေနိုင်သည့်အတွက် သတိပြုဆင်ခြင်ပေးကြပါရန်လည်းအထူးမေတ္တာရပ်ခံထားသည်။
မကွေးတိုင်းနှင့် ချင်းပြည်နယ်အစပ် ယောနှင့် ဆောနယ် များတွင် ဒေသခံ ကာကွယ်ရေးတပ်များနှင့် အာဏာသိမ်းစစ်ကောင်စီတပ်တို့ကြားတိုက်ပွဲများပြင်းထန်နေသည်။ စက်တင်ဘာ ၁၄ ရက်ကလည်း
ဆောနှင့်ကန်ပက်လက်ကြားတွင် CDF-ကန်ပက်လက်နှင့် စစ်ကောင်စီတပ်တို့ တိုက်ပွဲဖြစ်ပွားရာ ဆောPDFက CDF-ကန်ပက်လက်ကို လုံခြုံရေးယူပေးပြီးကူညီဝန်းရံခဲ့သည်။
Public Service Announcement
ထိုတိုက်ပွဲတွင် စစ်ကောင်စီတပ်ဖွဲ့ဝင် ၁၀ ဦးကျော်သေဆုံးခဲ့ကြောင်း CDFကန်ပက်လက်ကထုတ်ပြန်သည်။
အလားတူ စက်တင်ဘာ ၁၅ ရက်တွင်လည်း CDF- ကန်ပက်လက်နှင့်စစ်ကောင်စီတပ်တို့ တိုက်ပွဲ ပြင်းထန်ခဲ့ပြီး စစ်ကောင်စီတပ်မှ ၄ ဦးသေဆုံးပြီး အများအပြားဒဏ်ရာရရှိခဲ့သည်။ CDF ကန်ပက်လက် တပ်ဖွဲ့ဝင်များ ထိ့ခိုက် ကျဆုံးမှုမရှိခဲ့ဟု CDF ကန်ပက်လက်ကထုတ်ပြန်သည်။”
