စစ်ကိုင်းတိုင်း ပင်လည်ဘူးမြို့နယ်တွင် စစ်ကောင်စီတပ်ကို ဒေသခံပြည်သူ့ကာကွယ်ရေးတပ်ဖွဲ့(PDF)များက တိုက်ခိုက်ခဲ့၍ စစ်ကောင်စီတပ်မှ အရာရှိအပါအဝင် ထိခိုက်သေဆုံးသူများပြားခဲ့ကြောင်းစစ်ကိုင်းတိုင်းဒေသခံ တစ်ဦးက ပြောသည်။
ကချင်ဒေသအခြေစိုက် သတင်းဌာန The 74 Media ကလည်း ပင်လည်ဘူးမြို့နယ် မူးမြစ်တံတားပေါ် တွင် စက်တင်ဘာ ၂၂ရက်ညနေပိုင်းက ဖြစ်ပွားသည့် တိုက်ပွဲတွင် စစ်ကောင်စီတပ်မှ သေဆုံးမှုများပြားပြီး စစ်ကောင်စီတပ်၏လက်နက်ခဲယမ်းများကို PDFတပ်ဖွဲ့ဝင်များက သိမ်းဆည်းနိုင်ခဲ့သည်ဟု ဖော်ပြသည်။
တိုက်ပွဲ၌ စစ်ကောင်စီတပ်မှ ဗိုလ်ကြီး တစ်ဦးအပါအဝင် သေဆုံးမှုများပြားပြီး ၊ အထိနာသည့် စစ်ကောင်စီတပ်သည် ဒေသခံ ၇ဦးကို ဖမ်းဆီးကာ လူသားဒိုင်းအဖြစ် အသုံးပြု ဆုတ်ခွာသွား ကြောင်း ဒေသခံတစ်ဦးက ပြောသည်။
“အဲဒီမှာမှ ပြည်သူတွေကို လူသားဒိုင်းလုပ်ပြီးခေါ်သွားတာ။ ၇ ယောက်မှာ တစ်ယောက်ကို ကြိုးတုပ်ပြီးမှ ပစ်သတ်တာတဲ့။ PDFက မဟုတ်ဘူး အရပ်သားတွေကို ခေါ်သွားတာ။ ဒါက ပြည်သူအပေါ်မှာ မညှာတာ။ သူတို့ မညှာတာခဲ့တာက ဖြစ်ရပ်ပေါင်းများစွာမှာ အများကြီး မညှာတာခဲ့တာပါပဲ။ အခုဟာလည်း သူတို့ တကယ်အကြပ်အတည်းဖြစ်တဲ့အခါမှာ ပြည်သူကို လူသားတံတိုင်းလုပ်ပြီး ခေါ်သွားတာ” ဟု ၎င်းကရှင်းပြသည်။
ပင်လည်ဘူး၊ ကောလင်း နှင့် ဝန်သို PDF များ ပူးပေါင်းတိုက်ခိုက်ခြင်းဖြစ်သည်ဟု သတင်းဖော်ပြမှုများ ရှိသော်လည်း People’s Spring အနေဖြင့် သီးခြား အတည်ပြုနိုင်ခြင်းမရှိသေးပါ။
စက်တင်ဘာ ၂၀ရက်ကလည်း ကောလင်းမှ ပင်လည်ဘူးဘက်သို့ တောလမ်းအတိုင်း ချီတက်လာသည့် စစ်ကောင်စီ အင်အား ၃၀ ခန့်ကို ပင်လည်ဘူး PDF က တိုက်ခိုက်ခဲ့ကြောင်း အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန၏ နေ့စဉ်စစ်ရေးသတင်းဖော်ပြချက်၌ ထုတ်ပြန်ထားသည်။
ဓါတ်ပုံ -The 74 media