အကြမ်းဖက်စစ်ခေါင်းဆောင်ကို အာဆီယံထိပ်သီးအစည်းအဝေးမဖိတ်ဖို့ ဝန်ကြီးတွေဆွေးနွေးနေ

လာမယ့် အာဆီယံခေါင်းဆောင်တွေရဲ့ ထိပ်သီးအစည်း အဝေးမှာ မြန်မာအာဏာသိမ်းစစ်ခေါင်းဆောင်ကို မဖိတ်ကြားဖို့ အာဆီယံဝန်ကြီးတွေအကြားဆွေးနွေးမှုပြုလုပ်နေတယ်လို့ အထူးကိုယ်စားလှယ်က ဒီနေ့ပြောကြားပါတယ်။

အာဆီယံရဲ့ မြန်မာနိုင်ငံဆိုင်ရာ အထူးကိုယ်စားလှယ် Erywan Yusof က ပြောကြားခဲ့တာဖြစ်ပြီး မြန်မာစစ်ကောင်စီဟာ အာဆီယံရဲ့ ငြိမ်းချမ်းရေးလမ်းပြမြေပုံကို တိုးတက်အောင်လုပ်ဆောင်ခဲ့ ခြင်းမရှိဘူးလို့ သတင်းစာရှင်းလင်းပွဲမှာ ပြောဆိုခဲ့ပါတယ်။

ထိန်းသိမ်းခံထားရတဲ့ နိုင်ငံတော်အတိုင်ပင်ခံဒေါ်အောင်ဆန်းစုကြည်နဲ့တွေ့ဆုံဖို့ အထူးကိုယ်စားလှယ်ရဲ့ တောင်းဆိုမှုကို မြန်မာစစ်ကောင်စီက တိုက်ရိုက်တုံ့ပြန်တာမျိုးမရှိသေးဘူးလို့ အထူးကိုယ်စားလှယ်က ထပ်လောင်းပြောဆိုခဲ့ပါတယ်။

ပြီးခဲ့တဲ့ ဧပြီနှောင်းပိုင်းမှာ ကျင်းပခဲ့တဲ့ အာဆီယံခေါင်း ဆောင်တွေရဲ့ထိပ်သီးအစည်းအဝေးကို အကြမ်းဖက်စစ်ကောင်စီခေါင်းဆောင် မင်းအောင်လှိုင်တက်ရောက်ခဲ့ပြီး အဲဒီအစည်းအဝေး အပြီးမှာ အကြမ်းဖက်မှုရပ်တန့်ရေး၊ အထူးကိုယ်စားလှယ်ခန့်အပ်ရေး၊ တွေ့ဆုံဆွေးနွေးရေး စတဲ့ အချက်တွေပါဝင်တဲ့ သဘောတူဆုံးဖြတ်ချက် ၅ ရပ်ကို ကြေညာခဲ့ပါတယ်။

Public Service Announcement

ဒါပေမဲ့ အာဆီယံရဲ့ ဘုံဆုံးဖြတ်ချက် ၅ ရပ်ကို အကြမ်း ဖက်စစ်ကောင်စီက လိုက်နာအကောင် အထည်ဖော်ခြင်းမရှိသေးဘဲ အထူးကိုယ်စားလှယ်ခန့်အပ်အပြီး ၂ လကြာချိန်အထိ အထူးကိုယ် စားလှယ်ဟာ မြန်မာနိုင်ငံကို လာရောက်နိုင်ခြင်းမရှိသေးပါဘူး။

အထူးကိုယ်စားလှယ်ရဲ့ မြန်မာပြည်ခရီးစဉ်နဲ့ပတ်သက်လို့ ဆွေးနွေးညှိနှိုင်းနေဆဲဖြစ်တယ်လို့ အကြမ်းဖက်စစ်ကောင်စီက ထုတ်ပြန်ထားပါတယ်။