မြန်မာနိုင်ငံမှာ နှစ်ပေါင်း ၆၀ ကျော် စစ်တပ်ကျူးလွန်ခဲ့တဲ့ ရာဇဝတ်မှုတွေကို တာဝန်ခံမှုရှိဖို့နဲ့ တရားမျှတမှုရှိဖို့ လုပ်ဆောင်ရမယ်လို့ အမျိုးသားညီညွတ်ရေးအစိုးရ (NUG)လူ့အခွင့်အရေးဆိုင်ရာဝန်ကြီး ဦးအောင်မျိုးမင်းက တိုက်တွန်းပါတယ်။
အာဆီယံ အရပ်ဘက်လူမှုအဖွဲ့အစည်းညီလာခံ(ACSC)/ အာဆီယံ လူထုဖိုရမ်(APF) ဒုတိယနေ့ မှာ ဝန်ကြီးဦးအောင်မျိုးမင်းက မြန်မာစစ်တပ်ကျူးလွန်တဲ့ရာဇဝတ်မှုတွေကို နိုင်ငံတကာ တာဝန် ယူမှု၊ တာဝန်ခံမှု ယန္တရားတွေ ပူးပေါင်းပြီး အရေးယူဆောင်ရွက်ဖို့ တိုက်တွန်းခဲ့တာပါ။
အာဆီယံ အရပ်ဘက်လူမှုအဖွဲ့အစည်းညီလာခံ(ACSC)/ အာဆီယံ လူထုဖိုရမ်(APF) ပထမနေ့ကို “အာဏာရှင် စနစ်၊ စစ်တပ်နှင့် ကိုဗစ်-၁၉ : အရှေ့တောင်အာရှတခွင် ပိုမိုကြီးထွားလာသော တန်း တူညီမှုမရှိခြင်းနှင့် ပြည်သူ့ပါဝင်ခွင့်နယ်ပယ် ကျဉ်းမြောင်းလာခြင်းကို စုပေါင်းဖြေရှင်းရန် စိန်ခေါ်မှုများ” ခေါင်းစဉ်နဲ့ အောင်မြင်စွာကျင်းပနိုင်ခဲ့တယ်လို့ ထုတ်ပြန်ပါတယ်။
ဒုတိယနေ့မှာ “အပြစ်ပေးအရေးယူခံရခြင်းမှ ကင်းလွတ်ခြင်းအလေ့အထ- လူသားမျိုးနွယ်တရပ် လုံးအပေါ် ခြိမ်းခြောက်မှု- မြန်မာပြည်သူများအတွက် တရားမျှတမှု ပေါ်ပေါက်ရမည်” ခေါင်းစဉ် နဲ့ စုံညီအစည်းအဝေးကျင်းပခဲ့ပါတယ်။
Public Service Announcement
အဲဒီစုံညီအစည်းအဝေးမှာ စစ်အာဏာရှင်စနစ် တိုက်ဖျက်ရေးအထွေထွေသပိတ်ကော်မတီ(GSC) မှ ကိုရဲဝေဖြိုးအောင်က စစ်တပ်ဟာ ဖွဲ့စည်းပုံအခြေခံဥပဒေကိုသုံးပြီး အာဏာမြဲအောင် ပြုလုပ်ခဲ့ တာကြောင့် သမိုင်းကို ခြုံငုံကြည့်ပါက စစ်တပ်ကသာ ပြည်သူအပေါ် ဖိနှိပ်နေသူတွေဖြစ်ပြီး သူတို့ဖန်တီးထားတဲ့နိုင်ငံရေးစနစ်ကြောင့် ပြည်သူတွေဟာ ဒီမိုကရေစီကို ဘယ်လိုပုံစံမျိုးနဲ့မှ မခံစားရသေးဘူးလို့ ဆွေးနွေးပါတယ်။
မြန်မာနိုင်ငံတော်သစ်ဟာ ဒီမိုကရေစီ၊ အသွင်ကူးပြောင်းရေးကာလ တရားမျှတမှုနဲ့ လူ့အခွင့် အရေးကို ဗဟိုပြုနေရမယ်လို့ ကိုရဲဝေဖြိုးအောင်က ဆက်ပြောပါတယ်။
