မြန်မာနိုင်ငံမှာ မတရားဖမ်းဆီးထိန်းသိမ်းခံရသူတွေရဲ့ အခွင့်အရေးကို ကာကွယ်ပေးရေး နည်းလမ်းတွေကို နိုင်ငံတကာအသိုက်အဝန်းနဲ့သက်ဆိုင်သူတွေက အကြံပြုကြဖို့ ကုလသမဂ္ဂဆိုင်ရာမြန်မာသံအမတ်ကြီး ဦးကျော်မိုးထွန်းက မေးမြန်းတိုက်တွန်းပါတယ်။
မြန်မာစစ်တပ်က ဖေဖော်ဝါရီ ၁ရက် အာဏာသိမ်းပြီးနောက်ပိုင်း စစ်တပ်နဲ့ လုံခြုံရေးတပ်ဖွဲ့တွေဟာ ပြည်သူတွေကို အတင်းအကြပ်ပျောက်ကွယ်စေမှုများ ကျူးလွန်လျက်ရှိပြီး အာဏာသိမ်းပြီး ၈ လတာ ကာလအတွင်း စစ်တပ်က ၈,၉၈၁ ဦး ကျော် ဖမ်းဆီးခဲ့တယ်လို့ မြန်မာသံအမတ်ကြီးက (၇၆) ကြိမ်မြောက် ကုလသမဂ္ဂအထွေထွေ ညီလာခံ၊ တတိယကော်မတီမှာ မနေ့(အောက်တိုဘာ၁၈)က ပြောကြားခဲ့ပါတယ်။
ဖမ်းဆီးခံရသူတွေရဲ့ ထက်ဝက်ကျော်ကို ခိုင်မာတဲ့၊ ဥပဒေနဲ့ညီတဲ့ စွဲချက်တွေမရှိဘဲ ဖမ်းဆီးခဲ့တာ ဖြစ်ပြီး အကြမ်းဖက်စစ်တပ်ဟာ ဖမ်းဆီးခံရသူတွေနဲ့ပတ်သက်လို့ ရှင်းလင်းတဲ့ သတင်းအချက်အလက်တွေ ထုတ်ပြန်ပေးတာလည်းမရှိပါဘူး။
ကုလသမဂ္ဂရဲ့ အတင်းအကြပ်ပျောက်ကွယ် စေခြင်းမှ ကာကွယ်ပေးခြင်းဆိုင်ရာ ၁၉၉၂ ကြေညာစာတမ်းမှာ ဖော်ပြထားချက်အရ အခုလို မြန်မာစစ်တပ်ရဲ့ စနစ်တကျ ကျူးလွန်မှုဟာ လူသားမျိုးနွယ်အပေါ် ကျူးလွန်တဲ့ အခြားပြစ်မှုတစ်ခုပင် ဖြစ်တယ်လို့ မြန်မာသံအမတ်ကြီး ဦးကျော်မိုးထွန်းက ကုလသမဂ္ဂကို ပြောဆိုခဲ့ပါတယ်။
Public Service Announcement
