အကြမ်းဖက်စစ်ကောင်စီက ဖမ်းဆီးနှိပ်စက်ခဲ့၍ စစ်ကြောရေးတွင် ကွယ်လွန်ခဲ့သည့် ဂေါ်ရခါးလူမျိုး ကိုလင်းပိုင်စိုးအတွက် ဝမ်းနည်းကြောင်းနှင့် စစ်ကောင်စီကို သွေးကြွေးဆပ် ချေမှုန်းသွားမည်ဟု ဂေါ်ရခါးကာကွယ် ရေးတပ်(Gurkha Defence Force – GDF)က ယနေ့(အောက်တိုဘာ၁၉)ကြေညာချက်ထုတ်ပြန်သည်။
နေပြည်တော်နှင့် မန္တလေးမြို့တို့မှ စစ်ကောင်စီဆန့်ကျင်ရေး လူထုဆန္ဒထုတ်ဖော်ပွဲများတွင် ဦးဆောင်ခဲ့သည့် ကိုလင်းပိုင်စိုးကို စစ်ကောင်စီက စက်တင်ဘာ ၃၀ရက်တွင် ဖမ်းဆီးသွားပြီး စစ်ကြောရေး၌ အောက်တိုဘာ ၁ ရက်တွင် သေဆုံးခဲ့သည်ကို မိသားစုက ယမန်နေ့ (အောက်တိုဘာ ၁၈)တွင်မှ သိရှိခဲ့သည်။
ကိုလင်းပိုင်စိုးကွယ်လွန်ခဲ့သည့်အပေါ် မိသားစုနှင့်ထပ်တူ ဝမ်းနည်းကြောင်းနှင့်တော်လှန်ရေးတွင် ကျဆုံးခဲ့သူတစ်ဦးချင်းစီအတွက် စစ်ကောင်စီအား သွေးကြွေး ဆပ်ချေမှုန်းသွားမည်ဟုလည်း GDFက ထုတ်ပြန်သည်။
” အာဏာရူးစစ်ကောင်စီနှင့် အပေါင်းအပါများလုံးကို သွေးကြွေးများပြန်လည်ပေးဆပ်ရင်း အောင်မြင်မှုပန်းတိုင် ဆွတ်ခူးနိုင်သည်အထိ တိုက်ခိုက်ချေမှုန်းသွားမည်ဖြစ်ကြောင်း ဂတိသစ္စာပြုအပ်ပါသည်”ဟု GDFက ပြည်သူလူထုထံ သစ္စာပြုထားသည်။
ကိုလင်းပိုင်စိုးသည် ကျောက်ဆည်နည်းပညာတက္ကသိုလ်မှ နောက်ဆုံးနှစ်အင်ဂျင်နီယာကျောင်းသားတစ်ဦး ဖြစ် သည်။
