၈၈ မျိုးဆက်ကျောင်းသားခေါင်းဆောင် ဦးဂျင်မီအပါအဝင် ဒီမိုကရေစီလိုလားသူတွေနဲ့ လူ့အခွင့်အရေးကာကွယ်စောင့်ရှောက်သူတွေကို လုံခြုံရေးတပ်ဖွဲ့ဝင်တွေရဲ့ ဆက်လက်ဖမ်းဆီးနေမှု တွေ၊ မတရားဖိနှိပ်နေမှုသတင်းတွေကြောင့် အလွန်အမင်းစိုးရိမ်တယ်လို့ အမေရိကန်သံရုံးက ဒီနေ့ (အောက်တိုဘာ ၂၅ ရက်)မှာ ထုတ်ပြန်ပါတယ်။
စစ်အာဏာသိမ်းပြီးချိန်ကစလို့ မတရားဖမ်းဆီးထိန်းသိမ်းခံထားရသောသူများကို ပြန်လွှတ်ပေးဖို့စစ်အာဏာရှင်တွေကို ဆက်လက်တိုက်တွန်းကြောင်းနဲ့ လုံလောက်တဲ့ဆေးဝါးကုသခွင့် ချက်ချင်းပံ့ပိုးပေးရေးအပါအဝင် ဖမ်းဆီးထိန်းသိမ်းခံထားရသူတွေရဲ့ ဂုဏ်သိက္ခာနဲ့အခြေခံ လူ့အခွင့်အရေးတွေကို လေးစားလိုက်နာဖို့ တောင်းဆိုကြောင်း ရန်ကုန်အခြေစိုက် အမေရိကန်သံရုံးက ထုတ်ပြန်ပါတယ်။
မြန်မာပြည်သူတွေ လိုလားတောင့်တနေတဲ့ ဒီမိုကရေစီစနစ်ဆီ ပြန်သွားဖို့နဲ့ အကြမ်းဖက်မှုတွေ ဆက်လက်ကျူးလွန်နေတဲ့ စစ်အာဏာရှင်အနေနဲ့ တာဝန်ယူမှု၊ တာဝန်ခံမှုရှိလာစေဖို့ အမေရိကန်ပြည်ထောင်စုက ကတိကဝတ်ပြုထားဆဲဖြစ်တယ်လို့ ထုတ်ပြန်ချက်မှာ ဖော်ပြပါတယ်။
