ဒီနေ့မနက်ပိုင်းက မန္တလေး ကညနရုံးရှေ့မှာ ဖြစ်ပွားတဲ့ပေါက်ကွဲမှုမှာ ဒဏ်ရာရသူ ၁၀ ဦးခန့်ရှိပြီး အဲဒီလူနာတွေထဲ လူမှုကူညီရေးအသင်းက ၅ ဦးပါဝင်တယ်လို့ မြန်မာနိုင်ငံလူမှုကယ်ဆယ်ရေးအဖွဲ့ (မန္တလေးတိုင်းဒေသကြီး)ကနေစုံစမ်းသိရပါတယ်။
ပေါက်ကွဲမှုဟာ ၂ ကြိမ်ဖြစ်ခဲ့တာဖြစ်ပြီး ကနဦးပေါက်ကွဲမှုအပြီး သွားရောက်ကူညီတဲ့ လူမှုကူညီရေးအသင်းကသူတွေဟာ ဒုတိယအကြိမ်ပေါက်ကွဲမှုမှာ ထိခိုက်ဒဏ်ရာရသွားတာပါ။
ဒဏ်ရာရသွားတဲ့ လူမှုကူညီရေးအသင်းကသူတွေဟာ ရွှေမန္တလေးလူမှုကယ်ဆယ်ရေးအသင်းမှ ၃ဦး၊ဌာနီအရှေ့ လူမှုကယ်ဆယ်ရေးအသင်းမှ ၂ဦး တို့ဖြစ်ပါတယ်။ ဒဏ်ရာရသွားတဲ့သူတွေကို မန္တလေးဆေးရုံမှာကုသပေးနေတယ်လို့သိရပါတယ်။
ကနေ့ကညနရုံးရှေ့ ပေါက်ကွဲမှုဟာ Special Attacking Force (Upper Burma) ရဲ့လက်ချက်လို့အဲဒီအဖွဲ့က ထုတ်ပြန်ထားပါတယ်။
ပြည်သူကိုသတ်မယ့် ကျည်ဆံဖိုးတွေ စစ်ကောင်စီဆီစီးဆင်းနေတာကို လုံးဝဖြတ်တောက်ဖို့ရည်ရွယ်တဲ့လှုပ်ရှားမှုသာဖြစ်တယ်လို့ဆိုထားပါတယ်။
မလိုလားအပ်တဲ့ထိခိုက်မှုတွေရှောင်နိုင်ဖို့ ပြည်သူတွေအနေနဲ့ စစ်ကောင်စီထောက်တိုင်တွေနဲ့ဝေးဝေးတွင်သာနေကြဖို့ကိုလည်းတိုက်တွန်းထားတာတွေ့ရပါတယ်။
လက်ရှိမှာပေါက်ကွဲမှုဖြစ်ပွားခဲ့တဲ့ ကနညရုံးဘေးရှိ လမ်း၁၁၀(သိပ္ပံလမ်း)၊ ၇၃လမ်းနဲ့ ၇၈လမ်းကြားကို အသွားအလာပိတ်ထားပြီး စစ်ကောင်စီက လုံခြုံရေးယူထားတာတွေ တွေ့ရပါတယ်။