ချင်းပြည်နယ် မတူပီမြို့နယ်နှင့် ပလက်၀မြို့နယ် အစပ်တွင် ဖြစ်ပွားသည့် တိုက်ပွဲ၌ စစ်ကောင်စီဘက်မှ ၆ဦး သေဆုံးခဲ့ကြောင်း မတူပီ ချင်းကာကွယ်ရေးတပ်ဖွဲ့(CDF)က ထုတ်ပြန်သည်။
နိုဝင်ဘာ ၁၀ရက် မနက်ပိုင်းက မတူပီ – ပလက်၀ အစပ် ဒီလောင်ကုန်းရွာ (က)နှင့် (ခ) အကြား တွင် မတူပီ CDFနှင့် စစ်ကောင်စီတပ်တို့ တိုက်ပွဲဖြစ်ပွားခဲ့ပြီး CDF တပ်သား တစ်ဦး ထိခိုက်ဒဏ်ရာရရှိခဲ့ ကြောင်း၊ ကျဆုံးသူ မရှိကြောင်း ဖော်ပြသည်။
မတူပီ – ပလက်၀ လမ်းတွင် အောက်တိုဘာ ၃၀ရက်မှစ၍ တိုက်ပွဲများဖြစ်ပွားနေရာ ယခင်တိုက်ပွဲများ၌ စစ်ကောင်စီတပ်မှ ၃၀ကျော်သေဆုံးခဲ့ပြီး ထိခိုက်ဒဏ်ရာရမှုများရှိခဲ့သည်။
ယခုရက်ပိုင်းအတွင်း ချင်းပြည်နယ် မြောက်ပိုင်း ဟားခါး၌ စစ်ရေးအခြေအနေ တည်ငြိမ်နေသော်လည်း ချင်းပြည်နယ် တောင်ပိုင်း မတူပီ – ပလက်၀ နယ်စပ်နှင့် မင်းတပ် – မတူပီ ကာလမ်း မင်းတပ်အထွက်၌ ဒေသခံ CDF တပ်ဖွဲ့များနှင့် စစ်ကောင်စီတပ်တို့ ထိတွေ့မှုများရှိကြောင်း ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြောသည်။
Public Service Announcement
နိုဝင်ဘာလဆန်းမှစ၍ စစ်ကောင်စီတပ်က အနော်ရထာ စစ်ဆင်ရေး အမည်ဖြင့် ထိုးစစ်ဆင်မှု လုပ်ဆောင်နေရာ ချင်းပြည်နယ်ရှိ မြို့နယ် ၉ခုအနက် မြို့နယ် ၇ခု၌ တိုက်ပွဲ ဖြစ်ပွားမှုများရှိကြောင်း ဆလိုင်းထက်နီက ပြောသည်။
တိုက်ပွဲများ ပိုမိုဖြစ်ပွားလာနိုင်သည့် အခြေအနေတွင် ပြည်သူများသတိထား နေထိုင်သွားလာကြရန် မေတ္တာရပ်ခံထားကြောင်း ၎င်းကဆိုသည်။
