လွတ်မြောက်နယ်မြေ၌ ရောက်ရှိနေသည့် အဆိုတော် နိုဗန်ထူးက နိုဝင်ဘာ ၂၆ ရက်ညတွင် အွန်လိုင်းဖျော်ဖြေပွဲ ပြုလုပ်မည်ဖြစ်ကြောင်း ဖေ့စ်ဘွတ်ခ်မှ အသိပေးထားသည်။
“ကျွန်တော်ပိုက်ဆံလိုလို့ပါ။ ပိုက်ဆံဘာကြောင့်လိုလဲ။ ကျွန်တော့် ရဲဘော်တွေကို ကျွေးမွေးချင်တယ်။ လာမယ့် ၂၈ ရက်နေ့က ကျွန်တော့်မွေးနေ့ဖြစ်တယ်။ အဲဒီမှာ ရဲဘော်တွေနဲ့ မွေးနေ့ကျင်းပမယ်”ဟု ၎င်းကပြောသည်။
ထို့ကြောင့် ပရိသတ်များအနေဖြင့် တတ်နိုင်သလောက်ပံ့ပိုးပေးရန် နိုဗန်ထူးကမေတ္တာရပ်ခံသည်။
နိုဝင်ဘာ ၂၆ ရက်ညတွင် ဖျော်ဖြေပွဲပြုလုပ်မည်ဖြစ်ပြီး ဖျော်ဖြေချိန်တစ်နာရီခန့် ကြာမြင့်မည်ဖြစ်ကာ Acoustic သီချင်းများဖြင့်ဖျော်ဖြေပေးမည်ဟု ၎င်းကဆိုသည်။
“ဆိုမယ့်သီချင်းတွေက အသစ်ရေးထားတဲ့ သီချင်းတွေပါမယ်။ အရင်က ကျွန်တော့်သီချင်းတွေပါမယ်။ ပြီးတော့ မထွက်ရသေးတဲ့Acoustic ဟာတွေလည်းပါမယ်။ Metal ကတော့ ဆိုပြဖို့ အစီအစဥ်မရှိဘူး။” ဟု နိုဗန်ထူးကပြောသည်။
လက်ရှိအချိန်တွင် ပြည်သူအားလုံးသည် ဘဝတူများဖြစ်သောကြောင့် ငွေကြေးရှိသူများအနေဖြင့်ပို၍ ပံ့ပိုးပေးရန် ၎င်းကပြောသည်။
နိုဗန်ထူးသည် အာဏာသိမ်းခံရသည့် အချိန်ကတည်းက ပြည်သူနှင့်အတူ ရပ်တည်ခဲ့ပြီး လက်ရှိအချိန်၌ လွတ်မြောက်နယ်မြေတွင် ရောက်ရှိနေသည်။