သက်ဝေ/People’s Spring
ရှမ်းပြည်နယ်မြောက်ပိုင်း၊ တန့်ယန်းမြို့နယ်အတွင်းဖမ်းမိခဲ့သည့် ကျားဖျန်လုပ်ငန်းလုပ်ကိုင်သူ (အွန်လိုင်းလိမ်လည်လုပ်ငန်းလုပ်ကိုင်သူ) တရုတ်နိုင်ငံသား ၇၆၀ကျော်ကို တရုတ်အစိုးရထံ လွှဲပြောင်းပေးခဲ့ကြောင်း ၀ပြည်သွေးစည်းညီညွတ်ရေးပါတီ(UWSP/UWSA) လားရှိုးဆက်ဆံရေးရုံးတာဝန်ခံ ဦးညီရန်းက အတည်ပြုသည်။
၁၀၂၇ စစ်ဆင်ရေး ဒုတိယပိုင်းကာလ ယခုနှစ် ဇူလိုင်တွင် UWSA တပ်ဖွဲ့များ ဝင်ရောက်နေရာယူခဲ့သည့် တန့်ယန်းမြို့နယ်အတွင်း၌ ကျားဖျန်လုပ်ငန်းလုပ်ကိုင်သူ ၁,၀၀၀ ကျော်ဖမ်းမိခဲ့ခြင်းဖြစ်ပြီး ၇၆၂ဦးကို နိုဝင်ဘာ ၁၉ရက်တွင် တရုတ်ထံ လွှဲပြောင်းခဲ့ခြင်းဖြစ်သည်ဟု ဆိုသည်။
“ကျနော်တို့”ဝ”အဖွဲ့လုပ်ရှားတဲ့တန့်ယန်းနယ်မှာကျားဖျန် ၁၀၀၀ ကျော်ဖမ်းမိတယ်။ ၇၆၂ ယောက်က တရုတ်ပြည်ကလူပါ။မနေ့က”ဝ” တရုတ်နယ်စပ်ခြားဂိတ်မှာလွဲပြောင်းပေးလိုက်ပါတယ်” ဟု ဦးညီရန်းက ပြောသည်။
Public Service Announcement
ထို့အပြင် ကျားဖျန်လုပ်ကိုင်သူ တရုတ်နိုင်ငံသား ၇၆၂ ဦးနှင့် အတူ ဂြိုလ်တုအင်တာနက် (starlink) ၇၆ ခု၊ ဖုန်း ၁၅၄၉ လုံး၊ ကွန်ဗျူတာ ၈၂ လုံးတို့ကို ဖမ်းဆီးရမိခဲ့သည်ဟု Wa News Land က ဖော်ပြသည်။
လွှဲပြောင်းမှုကို မိုင်းမောခရိုင် ပန်ဝိုင်မြို့နယ်ရှိ ဒီယုံးဟော့ နယ်ခြားဂိတ်၌ ပြုလုပ်ခဲ့သည်ဟု ဖော်ပြသည်။
UWSAသည် ၂၀၂၃ နှစ်ကုန်ပိုင်းကလည်း အွန်လိုင်းလိမ်လည်လုပ်ငန်း လုပ်ကိုင်သူ တရုတ်နိုင်ငံသား ထောင်ချီကို တရုတ်နိုင်ငံ ရဲတပ်ဖွဲ့ထံ လွှဲပြောင်းပေးခဲ့ဖူးသည်။
