မြန်မာနိုင်ငံရဲ့ အိမ်နီးချင်း ၂ နိုင်ငံအပါအဝင် အာရှက နိုင်ငံ ၃ နိုင်ငံကို ကမ္ဘာ့ ဖွံ့ဖြိုးမှုအနိမ့်ကျဆုံးနိုင်ငံများစာရင်းကနေ ဖယ်ရှားဖို့ နိုဝင်ဘာလ ၂၄ ရက်မှာကျင်းပတဲ့ ကုလသမဂ္ဂအထွေထွေညီလာခံမှာ သဘောတူလိုက်ကြပါတယ်။
အဲဒီနိုင်ငံတွေကနေ ဘင်္ဂလားဒေ့ရှ် ၊ လာအိုနဲ့ နီပေါ နိုင်ငံတွေပဲဖြစ်ပါတယ်။
ဒီ ၃ နိုင်ငံကို ဖွံ့ဖြိုးမှုအနိမ့်ကျဆုံးနိုင်ငံများစာရင်းကနေ ဖွံ့ဖြိုးဆဲနိုင်ငံစာရင်းကို ကူးပြောင်းဖို့အတွက် ကုလသမဂ္ဂက ၅ နှစ်အချိန်ပေးလိုက်ပါတယ်။
ဒီ ၅ နှစ်အတွင်းမှာသတ်မှတ်စံနှုန်းတွေနဲ့ကိုက်ညီရင် လာမယ့် ၂၀၂၆ ခုနှစ်မှာ ဖွံ့ဖြိုးမှုအနိမ့်ကျဆုံး စာရင်းကနေ လွတ်မြောက်သွားကြမှာပါ။
Public Service Announcement
ကမ္ဘာမှာ ဖွံ့ဖြိုးမှုအနိမ့်ကျဆုံးနိုင်ငံတွေအဖြစ် ကုလက သတ်မှတ်ထားတဲ့ နိုင်ငံ ပေါင်း ၄၆ နိုင်ငံရှိပြီး မြန်မာနိုင်ငံလည်းပါဝင်ပါတယ်။
၁၉၆၂ ခုနှစ်မှာ စစ်တပ်က အာဏာသိမ်းပြီး တပါတီအာဏာရှင်စနစ်နဲ့ တိုင်းပြည်ကို အုပ်ချုပ်စီမံရာမှာ မြန်မာနိုင်ငံဟာ ၁၉၈၇ ခုနှစ်မှာ ဖွံ့ဖြိုးမှုအနိမ့်ကျဆုံးနိုင်ငံစာရင်းထဲဝင်သွားပါတော့တယ် ။
အဲဒီအချိန်ကတဦးချင်းဝင်ငွေနည်းပါးတာ ၊ကျန်းမာရေး ၊လူမှုရေး ၊ပညာရေးအခြေအနေနိမ့်ကျတာ ၊စီးပွားရေးလုပ်ကိုင်ရာမှာ ထိခိုက်နစ်နာလွယ်တာတွေကြောင့် အဲဒီစာရင်းထဲဝင်ခဲ့ရတာလို့သိရပါတယ်။
NLD အစိုးရလက်ထက် ပြီးခဲ့တဲ့ ၂၀၁၈ ခုနှစ်အတွင်းက မြန်မာနိုင်ငံဟာ စံနှုန်းတွေကို ပထမဆုံးအကြိမ် ပြည့်မီလာတဲ့အတွက် ဖွံ့ဖြိုးမှုအနိမ့်ကျဆုံးနိုင်ငံကနေ ၂၀၂၁ ခုနှစ်နောက်ပိုင်းမှာ လွတ်မြောက်ဖို့ လမ်းစပွင့်သွားပြီလို့ နိုင်ငံခြားရေးဝန်ကြီးဌာနက သတင်းထုတ်ပြန်ဖူးပါတယ်။
ဒါပေမယ့် စစ်တပ်ရဲ့အာဏာသိမ်းမှုကို ၂၀၂၁ နှစ်စပိုင်းမှာတင်ကြုံလိုက်ရပြီး တိုင်းပြည်ရဲ့ နိုင်ငံရေး ၊စီးပွားရေး ၊လူမှုရေးကဏ္ဍ အသီးသီးမှာနိမ့်ကျလာတာကိုကြုံနေရပါတယ်။
ဓာတ်ပုံ − ရိုက်တာ
