ထိုင်းနိုင်ငံခြားရေးဝန်ကြီးရဲ့ မြန်မာခရီးစဉ် လူသားချင်းစာနာမှုအကူအညီပေးရေးအတွက်ဖြစ်တယ်လို့ ရှင်းလင်း

ထိုင်းနိုင်ငံခြားရေးဝန်ကြီးရဲ့မြန်မာနိုင်ငံခရီးစဉ်ဟာ လူသားချင်းစာနာမှုအကူအညီပေးရေး အတွက်ဖြစ်တယ်လို့ ဝန်ကြီး Don Pramudwinai က နိုဝင်ဘာ ၂၅ ရက်မှာ အောက်လွှတ်တော်ကို ရှင်းလင်းပါတယ်။

ထိုင်းနိုင်ငံခြားရေးဝန်ကြီး Don Pramudwinai ရဲ့ နိုဝင်ဘာ ၁၄ ရက် မြန်မာနိုင်ငံခရီးစဉ်နဲ့ ပတ်သက်လို့ အောက်လွှတ်တော်အမတ် Sutin Klungsang က မေးမြန်းခဲ့ရာ ဝန်ကြီးကပုဂ္ဂလိကအဖွဲ့အစည်း ၁၇ ခု လှူဒါန်းတဲ့ ဆေးဝါးပစ္စည်းအပါအဝင် အကူအညီ ၁၅ တန် သွားရောက်ပေးအပ်ခဲ့တာလို့ ပြန်လည်ဖြေကြားပါတယ်။

နောက်ထပ် အကူအညီပစ္စည်း ၂ တန်ကိုလည်း လာမယ့်ရက်ပိုင်းအတွင်း ပေးပို့ပေးမှာဖြစ်တယ်လို့ ဝန်ကြီး Don က ဆက်ပြောပါတယ်။ အကူအညီပေးအပ်သူတွေထဲမှာ Unicef ၊ WHO နဲ့ Mae Fa Luang Foundation တို့ ပါဝင်ပါတယ်။

ဒါ့အပြင်သူ့ခရီးစဉ်ဟာ လူသားချင်းစာနာမှုဆိုင်ရာအကြောင်းပြချက်တွေနဲ့ အမျိုးသားအကျိုးစီးပွားအတွက်ဖြစ်ခဲ့တယ်လို့ ဝန်ကြီး Don က ပြောပါတယ်။ မြန်မာနဲ့ထိုင်းတို့ဟာ နယ်နိမိတ်ချင်း ၂၄၀၀ ကီလိုမီတာ ထိစပ်နေတာဖြစ်ပါတယ်။

Public Service Announcement

ဒါပေမဲ့ ထိုင်းနိုင်ငံခြားရေးဝန်ကြီးရဲ့ မြန်မာပြည်ခရီးစဉ်အပေါ် ဝေဖန်မှုတွေရှိခဲ့ပြီး အဲဒီခရီးစဉ်ကြောင့် လာမယ့်ဒီဇင်ဘာမှာ အမေရိကန်က ကမကထပြုကျင်းပမယ့် ‘The Summit of Democracy’ တက်ရောက်ဖို့ ထိုင်းကို ဖိတ်ကြားခဲ့ခြင်းမရှိပါဘူး။

အဲဒီလို ဖိတ်ကြားခြင်းမရှိတဲ့အပေါ် ထိုင်းနိုင်ငံခြားရေးဝန်ကြီးက ဖိတ်ကြားခဲ့မယ်ဆိုရင် တက်ရောက်ဖို့ သင့်၊ မသင့် ဆုံးဖြတ်ရမှာဖြစ်ပြီး ကိစ္စအများအပြားမှာ အသွားနှစ်ဖက်ရှိတဲ့ဓားသွား တွေဖြစ်တယ်လို့ တုံ့ပြန်ပါတယ်။

ကိုးကား – Bangkok Post