စစ်ကိုင်းတိုင်း၊ ရွှေဘိုမြို့တွင် အမျိုးသားနှစ်ဦးဆိုင်ကယ်တစ်စီးတည်းစီးလာစဥ် အကြမ်းဖက်စစ်ကောင်စီတပ်များက လိုက်လံပစ်ခတ်၍ အသက်၁၉နှစ်အရွယ်လူငယ်တစ်ဦးသေဆုံးခဲ့ကြောင်း ဒေသခံများက ပြောသည်။
ယမန်နေ့ (နိုဝင်ဘာလ ၂၅ ရက်)ညနေ ၆း၄၅ နာရီအချိန်ခန့်က ရွှေဘိုမြို့ပေါ် ကြေးရုပ်ကြီး သံလမ်းဆုံ အနီးတွင် အမျိုးသားနှစ်ဦး ဆိုင်ကယ်အတူစီးလာသောကြောင့် အကြမ်းဖက်စစ်ကောင်စီတပ်များမှသေနတ်ဖြင့်လိုက်လံပစ်ခတ်ခဲ့ကြောင်း၊ ၁ဦးမှာ ပြင်းထန်စွာ ဒဏ်ရာရရှိခဲ့ပြီးနောက် သေဆုံးသွားကြောင်း ဒေသခံများက ပြောသည်။
အပစ်ခံရသူသည် အသက် ၁၉ နှစ်အရွယ် မောင်ဝင်းမင်းထွန်းဆိုသူဖြစ်ပြီး ကျည်ဆီးခုံမှန်ကာ သေဆုံးခဲ့ရခြင်းဖြစ်ကြောင်း၊ ရွှေဘိုမြို့၊ ရွှေဘုံသာဘုရားကုန်းပေါ်ရှိ ကျောက်ခွေလုပ်သည့်နေအိမ်မှဖြစ်ကြောင်းဒေသခံများက ပြောသည်။
အကြမ်းဖက်စစ်ကောင်စီတပ်ကမြို့အများစုတွင် အမျိုးသားနှစ်ဦး ဆိုင်ကယ်တစ်စီးတည်းအတူတူ စီးနင်းခွင့်မပြုကြောင်းတားမြစ်ကန့်သတ်နေပြီး၊ အမျိုးသားနှစ်ဦး စီးနင်း၍ဟုဆိုကာ အကြမ်းဖက်စစ်အုပ်စုကသေနတ်ဖြင့် လိုက်လံပစ်ခတ်၍ သေဆုံးဒဏ်ရာရမှုများဖြစ်ပေါ်နေသည်
Public Service Announcement
