ကလေးမြို့ရှိ ခြေမြန်တပ်ရင်း (ခမ)၃၆၃မှ တပ်ကြပ်ကြီးစာရေးတစ်ဦးအပါအဝင် သုံးဦးသည် အာဏာသိမ်းစစ်ကောင်စီ၏ မတရားမှုများကို ဆန့်ကျင်ပြီး ၄င်းတို့ထံ အလင်းဝင်ရောက်လာသည်ဟု Chinland Defense Force – Kalay Kabaw Gangaw (CDF-KKG)က သတင်းထုတ်ပြန်သည်။
ခမရ ၃၆၃ ခြေမြန်တပ်ရင်းမှ တပ်ကြပ်ကြီးစာရေးMang Bawi Hring(ကိုယ်ပိုင်အမှတ် တ/၄၉၇၉၇၆) နှင့် အခြား နှစ်ဦး အလင်းဝင်လာခြင်းဖြစ်ကြောင်းယနေ့(နိုဝင်ဘာ ၃၀) ထုတ်ပြန်ခြင်းဖြစ်သည်။
အာဏာသိမ်းစစ်ကောင်စီ၏ မတရားမှုများကို ဆန့်ကျင်ပြီး CDM ပြုလုပ်ကာ CDF-KKG မှတဆင့် အလင်းဝင်ရောက်လာသူ အရေအတွက် စုစုပေါင်း (၆) ဦး ရှိပြီဟုလည်း အသိပေးထားသည်။
ထို့အပြင်စစ်အာဏာရှင်အား ဆန့်ကျင်ကာ CDM ပြုလုပ်လာသူများကို ဆုကြေးချီးမြင့်ခြင်းနှင့် လွတ်မြောက်နယ်မြေသို့ ပို့ဆောင်ပေးနေခဲ့သည့်CDF-KKG နောက်ဆက်တွဲသတင်းတစ်ခုလည်းထုတ်ပြန်ထားသည်။
၎င်းတို့အနေဖြင့် လက်နက်၊ကျည်အပြည့်အစုံနှင့် အလင်းဝင်ရောက်လာသူများကိုသာ လုံခြုံစိတ်ချရသော နယ်မြေသို့ ပို့ဆောင်ပေးပြီး ထိုက်သင့်သော ဆုကြေးကိုလည်း ချီးမြင့်သွားမည်ဖြစ်ကာ ၊လက်နက်/ကျည် မပါသူများကိုမူယင်းအစီအစဥ်အတွက် တာဝန်ယူတော့မည် မဟုတ်ဟု အသိပေးထားသည်။