အကြမ်းဖက်စစ်ကောင်စီက ဂန့်ဂေါနယ်တွင် နယ်မြေရှင်းလင်းရေးအကြောင်းပြကာ ရာဇဝတ်မှုများ ထပ်မံကျူးလွန်နိုင်၍ ဒေသခံများ လုံခြုံရာသို့အချိန်မီတိမ်းရှောင်နိုင်ရေး ကြိုတင်ပြင်ဆင်ထားရန်နှင့်စစ်ကောင်စီတပ်များ၏ စစ်ရေးအချက်အလက်များကိုအချိန်နှင့်တပြေးညီပေးပို့ရန် ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့ က တိုက်တွန်းချက် ထုတ်ပြန်သည်။
အကြမ်းဖက်စစ်ကောင်စီတပ်သည် အင်အားအများအပြားသုံးကာ ဂန့်ဂေါမြို့နယ်အတွင်း တောနင်းရှာဖွေခြင်း၊ နယ်မြေရှင်းလင်းရေးအကြောင်းပြ အကြမ်းဖက်ခြင်း၊ ၎င်းတို့စစ်ကြောင်းသွားလာရာဝန်းကျင်ရှိ နေအိမ်များကို ဖျက်ဆီးခြင်း၊ မီးရှိူ့ခြင်း၊ အပြစ်မဲ့ပြည်သူများကို ဖမ်းဆီးနှိပ်စက်ခြင်း၊ ၎င်းတို့သွားလာရာတွင် လူသားဒိုင်းကာအဖြစ် အသုံးပြုခြင်း တို့ကို ကျူးလွန်နေသည်ဟု ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့ က ယနေ့ (ဒီဇင်ဘာ ၂ရက်) သတင်းထုတ်ပြန်သည်။
ထိုသို့ အကြမ်းဖက်စစ်ကောင်စီတပ်များသည် လာမည့်ကာလများအတွင်း နယ်မြေရှင်းလင်းရေးအကြောင်းပြကာရာဇဝတ်မှုများကို ထပ်မံကျူးလွန်နိုင်ပါသေးသည်ဟုသတိပေးထားသည်။ ပြည်သူလူထုအနေဖြင့် စစ်ကောင်စီတပ်များ စစ်ကြောင်းထိုးလာပါက တိကျသေချာသော သတင်းအချက်အလက်များကို ရယူကာ စနစ်တကျအချိန်မီ ရှောင်ရှားကြရန် တိုက်တွန်းထားသည်။
စစ်ကောင်စီတပ်များ၏ အကြမ်းဖက်မှု၊ ရာဇဝတ်မှုများကိုလည်း ဂန့်ဂေါမြို့နယ် ပြည်သူ့အုပ်ချုပ်ရေးအဖွဲ့ထံ ပေးပို့တိုင်ကြားကြရန်နှင့် စစ်ကောင်စီတပ်များ၏ စစ်ရေးအချက်အလက်များကို သက်ဆိုင်ရာအဖွဲ့များထံ အချိန်နှင့်တပြေးညီပေးပို့ကြပါရန် တိုက်တွန်းနှိုးဆော်ထားသည်။
Public Service Announcement
ကလေးမြို့နှင့်ထိစပ်နေသော ဂန့်ဂေါမြို့သည် ပြည်သူ့ကာကွယ်ရေးတပ်များ အားကောင်းသည့်မြို့ဖြစ်ပြီးပြည်သူ့အုပ်ချုပ်ရေးအဆင့်ကိုလည်း တစ်ဆင့်ချင်းအကောင်အထည်ဖော်နေသည်။
