အမျိုးသားအရေးပေါ် အခြေအနေတွင် ချင်းပြည်သူများအနေဖြင့် စစ်ရေးနှင့် နိုင်ငံရေး အကျပ် အတည်း ကိုအကြောင်းပြုလျက် ချင်းပြည်ကို စွန့်ခွာပြီး တတိယနိုင်ငံများတွင် ခိုလှုံနိုင်ရေး နှင့် တတိယ နိုင်ငံ တွင် ခိုလှုံနိုင်ရေးအတွက် ချင်းပြည်သူအား စည်းရုံးခြင်း၊ လှုံ့ဆော်ခြင်း များ လုံး၀(လုံး၀) မပြုလုပ်ကြရန် ချင်းအမျိုးသားတပ်ဦး (CNF)က ယနေ့ ထုတ်ပြန်သည်။
ပြည်တွင်းချင်းမိဘပြည်သူများ၏ တောင်းဆိုချက်ကို အလေးဂရုပြုပြီး သက်ဆိုင်သူအားလုံးအား ယခုကဲ့သို့ အသိပေးလိုက်ခြင်းဖြစ်ကြောင်း CNFကဆိုသည်။
အာဏာသိမ်းပြီးနောက် စစ်ကောင်စီတပ်က အကြမ်းဖက်ဖိနှိပ်မှုများ လုပ်ဆောင်၍ ချင်းတိုင်းရင်း သားများ အနေဖြင့် ဌာနေကိုစွန့်ခွာပြီး တတိယ နိုင်ငံများ၌ ခိုလှုံရန် စဉ်းစားလာကြကြောင်း ချင်းအမျိုး သားတပ်ဦး/ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
စစ်ကောင်စီတပ် အာဏာသိမ်းပြီးနောက်ပိုင်း ချင်းပြည်နယ်တွင် အင်အား အလုံးအရင်းဖြင့် ထိုးစစ်ဆင်လာပြီး ချင်းပြည်သူများအား အကြမ်းဖက် ဖမ်းဆီးခြင်း၊ နှိပ်စက်ခြင်း၊ အမျိုးသမီးများအပေါ်အကြမ်းဖက် လိင်မှုကျူးလွန်ခြင်း၊ ပြည်သူ့ အသက် အိုးအိမ် စည်းစိမ်များ တိုက်တာ အဆောက်အဦ နှင့် ခရစ်ယာန်ဘုရားကျောင်း များ မီးရှို့ဖျက်ဆီးခြင်း စသည့် စစ်ရာဇဝတ်မှုများ လူမျိုးတုံးသတ်ဖြတ်မှုများကို ကျူးလွန်နေကြောင်း CNFက ထုတ်ပြန်သည်။
Public Service Announcement
စစ်ကောင်စီ၏ အကြမ်းဖက်လုပ်ရပ်သည် ချင်းအမျိုးသားနှင့် ချင်းပြည်လုံခြုံရေးကို ရည်ရွယ်ချက်ရှိရှိ ထိပါးဖျက်ဆီးနေခြင်းပင်ဖြစ်ကြောင်း ဖော်ပြထားသည်။
လက်ရှိတွင် စစ်ကောင်စီတပ်၏ အကြမ်းဖက်မှုများကြောင့် ချင်းဒေသခံများ ပြည်တွင်း၊ နယ်စပ် ဒေသ၌ စစ်ဘေးရှောင်နေကြရသည်ဟု ဆလိုင်းထက်နီက ပြောသည်။
“တချို့ဆို အိန္ဒိယ နိုင်ငံနယ်စပ်ထိ သွားပြီးတော့ တတိယနိုင်ငံအထိရမလားဆိုပြီး စိတ်ကူးတဲ့အနေ အထားက ချင်းအမျိုးသားတွေအတွက် စိုးရိမ်ဖွယ်ရာဖြစ်နေပါတယ်။ ပြည်တွင်းမှာ မနေရဲဘူ သူတို့က စစ်ကောင်စီအောက်မှာ မနေရဲဘူး စိတ်ဖိစီးလို့ စိတ်ဓာတ်ကျဆင်းမှုတွေကြောင့် အဲဒါတွေက အင်မတန်မှ ထိခိုက်တယ်” ဟု ၎င်းကဆက်ပြောသည်။
ယနေ့သည် ချင်းပြည်သူ တစ်ရပ်လုံးအနေဖြင့် စည်းလုံးညီညွတ်မှုကို အမြန်ဆုံးရေချိန်မြှင့်တင်လျက် ချင်းပြည်မှ တစ်ဖဝါးမှ မခွာဘဲ ချင်းအမျိုးသားလုံခြုံရေး၊ ချင်းပြည်ကာကွယ်ရေး နှင့် အမျိုးသားရေရှည် တည်တံ့ခိုင်မြဲရေးတို့အတွက် အကြမ်းဖက် စစ်ကောင်စီအား လက်နက်ကိုင် ခုခံတော်လှန်နေသည့် နိုင်ငံရေးအကျပ်အတည်းဆုံး အမျိုးသားအရေးပေါ် ကာလဖြစ်ကြောင်း CNFက ထုတ်ပြန်သည်။
CNF သည် စစ်ကောင်စီကိုဖြုတ်ချရန် အမျိုးသားညီညွတ်ရေးအစိုးရ၊ ဒေသကာကွယ်ရေးတပ်ဖွဲ့များ၊ တိုင်းရင်းသားလက်နက်ကိုင်အဖွဲ့များနှင့်ခုခံတော်လှန်နေသောလက်နက်ကိုင်တပ်ဖွဲ့ဖြစ်သည်။
စစ်အာဏာရှင်ဆန့်ကျင်ရေး ငြိမ်းချမ်းစွာဆန္ဒပြသောပြည်သူများကိုကျန်ဒေသများကဲ့သို့ အကြမ်းဖက်စစ်ကောင်စီတပ်က သေနတ်ဖြင့်ပစ်ခတ်သတ်ဖြတ်သဖြင့် CNF အပြင် ၊ချင်းဒေသလက်နက်ကိုင်အဖွဲ့ (CDF) ကိုပါ မြို့နယ်အလိုက်ဖွဲ့စည်း၍ ခုခံတော်လှန်နေသည်မှာ ထိ့ရောက်မှုရှိပြီး စစ်ကောင်စီတပ်အထိ့နာနေသော ပြည်နယ်ဖြစ်သည်။
