မိုင်းစမ်းသပ်စဥ် ပြည်သူ့ကာကွယ်ရေးရဲဘော်သုံးဦး ကျဆုံးခဲ့ကြောင်း ဒီပဲယင်းအခြေစိုက် ဂဠုန်တပ်တော်က ယနေ့ ထုတ်ပြန်သည်။
ကျဆုံးသွားသူများမှာ အသက် (၂၀)အရွယ်ခန့်သာ ရှိသေးသူများဖြစ်ပြီး ရဲဘော်အေးဇော်ဝင်၊ ရဲဘော်မျိုးမင်းထက်နှင့် ရဲဘော်ဇော်ဇော်နိုင်တို့ ဖြစ်သည်။
“မနေ့က(ဒီဇင်ဘာ ၅ ရက်) ဖြစ်တာပါ။အကြမ်းဖက် စစ်ကောင်စီကို မိုင်းဆွဲတာတွေ ပိုပြီးပြင်းထန်ဖို့ကြိုးစားရင်း ဖြစ်သွားရတာပေါ့”ဟု ဒီပဲယင်းမြို့နယ်ပြည်သူ့အုပ်ချုပ်ရေးအဖွဲ့ တာဝန်ရှိသူက ပြောသည်။
နိုဝင်ဘာ ၂၅ ရက်ကလည်း ဂဠုန်တပ်တော်မှ ပြည်သူ့ရဲဘော်နှစ်ဦးသည် အကြမ်းဖက် စစ်ကောင်စီတပ်ဖွဲ့ လာရောက်နိုင်သောလမ်းကြောင်းအား ကြိုတင်ဖောက်ခွဲတိုက်ခိုက်မှု ပြုလုပ်ရန် တပ်သားနှစ်ဦးမှာ ကြိုးစား၍ မိုင်းထောင်နေကြစဥ် မတော်တဆ ပေါက်ကွဲမှုနှင့်အတူ တော်လှန်ရေးအတွက် အသက်ပေးသွားခဲ့ရသည်။
စစ်ကိုင်းတိုင်းတွင် အကြမ်းဖက်စစ်ကောက်စီ၏ ထိုးစစ်ကို ခုခံတော်လှန်နေသည့် အားကောင်းသည့် နယ်မြေ ဖြစ်သော်လည်း လက်နက် မပြည့်စုံမှုကြောင့် လက်လုပ်မိုင်းများဖြင့်သာ အဓိကထား၍ စစ်ကောင်စီကို တိုက်ခိုက်နေရသည်။
ထို့ကြောင့် လက်နက်ခဲယမ်းများဝယ်ယူနိုင်ရေးအတွက် ပြည်သူလူထုမှ ထောက်ပံ့ပေးကြရန်လည်း တော်လှန်ရေး ပြည်သူ့တပ်ဖွဲ့အသီးသီးက မေတ္တာရပ်ခံနေသည်။
(ကျဆုံးခဲ့သည့် ရဲဘော်များကို မီးသဂြိုလ်နေစဥ်)