ပြည်သူ့ကာကွယ်ရေးတပ်ဖွဲ့ သုံးဖွဲ့ ပူးပေါင်းတိုက်ခိုက်မှုများကြောင့် အကြမ်းဖက်စစ်ကောင်စီတပ်မှ ရဟတ်ယာဥ်အသုံးပြုခဲ့သော်လည်း စစ်ကောင်စီတပ်မှအနည်းဆုံး ၃၃ ဦးသေဆုံးခဲ့ကြောင်း ယင်းကာကွယ်ရေးတပ်ဖွဲ့က သတင်းထုတ်ပြန်သည်။
အကြမ်းဖက်စစ်ကောင်စီတပ်ဖွဲ့ဝင်များသည် ဒီဇင်ဘာ ၂၂ ရက်တွင် နတ်ချောင်းကျေးရွာကို မီးရှို့ဖျက်ဆီးခြင်း၊ ကျေးရွာနေပြည်သူအချို့ကိုလည်း မတရားဖမ်းဆီးပြီး အဆိုပါကျေးရွာကျောင်းတွင် တပ်စွဲခဲ့သည်။
နတ်ချောင်းကျေးရွာတွင် တပ်စွဲထားသော အကြမ်းဖက်စစ်ကောင်စီတပ်ကို PDF(Kalay)၊ CNDF နှင့် ရပ်ရွာ ပ.က.ဖ ပူးပေါင်းတပ်များက ယနေ့ (ဒီဇင်ဘာ ၂၃)တွင် လေးဘက်လေးတန် ပိတ်ဆို့ကာ တိုက်ခိုက်ခဲ့ရာ ပူးပေါင်းအဖွဲ့က စစ်ရေး အသာစီးရနေချိန်တွင် စစ်ကောင်စီတပ်ကရဟတ်ယာဉ် ၂ စီးဖြင့် လေကြောင်းပစ်ကူဖြင့် တရစပ် ပစ်ခတ်ခဲ့ကြောင်း ထုတ်ပြန်ချက်၌ဖော်ပြသည်။ ထိုကြောင့်ပြည်သူ့ကာကွယ်ရေးတပ်ဖွဲ့ဝင်များကပြန်ဆုတ်ခဲ့ကြသည်။
နတ်ချောင်းကျေးရွာတိုက်ပွဲအတွင်း အကြမ်းဖက်စစ်သား အနည်းဆုံး ၁၆ ဦးသေဆုံးကြောင်းသိရပြီး ပြည်သူ့ကာကွယ်ရေး ပူးပေါင်းတပ်ဖွဲ့များဘက်မှ ၁ ဦး ထိခိုက်ဒဏ်ရာရရှိကြောင်း ထုတ်ပြန်ချက်၌ပါရှိသည်။
အလားတူ နတ်ချောင်းကို စစ်ကူလာသော စစ်ကောင်စီကား ၃ စီးမှာ ပြည်သူ့ကာကွယ်ရေတပ်ဖွဲ့(ကလေး) များ၏ မိုင်းခွဲတိုက်ခိုက်မှုကြောင့် ဇင်းကလင်းရွာအနီးတွင် ကား ၃ စီးစလုံးထိမှန်စုတ်ပြတ်ပျက်ဆီးခဲ့ပြီး အကြမ်းဖက်စစ်သား ၁၇ ဦး သေဆုံး သွားကြောင်း ဆက်လက်ဖော်ပြသည်။ ချင်းအမျိုးသားအဖွဲ့ချုပ်ကလည်း ယနေ့တိုက်ပွဲသတင်းထုတ်ပြန်ရာတွင် တိုက်ပွဲမှာတစ်နေကုန်နီးပါးကြာမြင့်ခဲ့ပြီး စစ်ကောင်စီတပ်မှ ၃၆ ဦးသေဆုံးကာအများအပြားဒဏ်ရာရရှိခဲ့ကြောင်းဖော်ပြထားသည်။ CNDF တပ်ဖွဲ့ မှ အသေးစားဒဏ်ရာရရှိသူ ၁ ဦးသာရှိပြီး ဘေးကင်းစွာဆုတ်ခွာနိုင်ခဲကြောင်းပါရှိသည်။
ထိုအပြင် ကလေးမြို့နယ် တောင်ပိုင်း တွင်လည်း ချင်းဒေသကာကွယ်ရေးတပ်၊ကလေး-ကဘော်-ဂန့်ဂေါ(CDF-KKG)က စစ်ကောင်စီတပ်နှင့်ပျူစောထီးပူးပေါင်းအဖွဲ့ကို ယနေတိုက်ခိုက်ခဲ့ကြောင်းထုတ်ပြန်သည်။
“ကလေးမြို့နယ်တောင်ပိုင်း ကြံသာရွာမှာ တပ်စွဲထားတဲ့ အကြမ်းဖက်စကစတွေနဲ့ ၎င်းတို့ရဲ့လက်ပါးစေ ဗျူစောထီးအဖွဲ့ ၂၀ ဝန်းကျင်ခန့်သည် ယနေ့ ညနေ ၃ နာရီအချိန်ခန့်တွင် မှန်တောရွာဖက်သို့ ခြေလျင်လျှောက်လာခဲ့သည်။
ဟံသာဝတီမှ စကတွေနှင့် ကြံသာမှာကျန်ခဲ့တဲ့ စကတွေပေါင်းပြီး ဖောကားအပါအဝင် ကားလေးစီးနှင့် မှန်တောရွာ ဖက်သို့မောင်းနှင်လာပြီး မှန်တောရွာတွင်လူချကာ နှစ်စီး ကြံသာဖက်သို့ပြန်လှည့်သွားသည်။ထို့နောက် အင်အားစုစုပေါင်း (၆၀) ခန့်ရှိ စကစမှ မှန်တော – ကမ္ဘာနီတံတားကြားရှိ သစ်တောများထဲသို့ လက်နက်ကြီးများဖြင့်ဦးစွာပစ်ခတ်ပြီး လက်နက်ငယ်များဖြင့် ဆက်တိုက်ပစ်ခတ်ကာ ခြေလျင်ဆက်လျှောက်လာခဲ့ကြသည်။ထို့ကြောင့် အဆိုပါနေရာများတွင် ကြိုတင်နေရာယူထားကြသည့် CDF – KKG တပ်ဖွဲ့ဝင်များမှ လက်လုပ်အမြှောက်များ၊ လက်နက်ငယ်များဖြင့် ပြန်လည်ပစ်ခတ်ကြရာ တစ်နာရီကျော်ကြာ အပြန်အလှန် ပစ်ခတ်မှုဖြစ်ပွားခဲ့သည်။အဆိုပါတိုက်ပွဲတွင် ရန်သူဖက်မှ ထိခိုက်ကျဆုံးမှုရှိနိုင်ပြီးမိမိတို့ CDF-KKG တပ်ဖွဲ့ ထိခိုက်ကျဆုံးမှုမရှိဘဲဆုတ်ခွာနိုင်ခဲ့သည်”ဟုဖော်ပြထားသည်။