ကလေးမြို့တောင်ပိုင်း၌ အကြမ်းဖက်စစ်ကောင်စီတပ်နှင့် သုံးနာရီကြာတိုက်ပွဲသေဆုံးမှုများဟု ထုတ်ပြန်

စစ်ကိုင်းတိုင်း ကလေးမြို့တောင်ပိုင်း၌ အကြမ်းဖက်စစ်ကောင်စီတပ်နှင့် သုံးနာရီကြာတိုက်ပွဲဖြစ်ပွားခဲ့ရာ စစ်ကောင်စီတပ်သားများ သေဆုံးမှုများနိုင်ဟု Chinland Defense Force – Kalay Kabaw Gangawက ထုတ် ပြန်သည်။

ယနေ့(ဇန်နဝါရီ ၁ ရက်) နံနက် ၈ နာရီခန့်က ကလေးမြို့နယ်တောင်ပိုင်း ကြံသာကျေးရွာတွင် တပ်စွဲထားသော စစ်ကောင်စီတပ်များသည် မှန်တောရွာဆီသို့ ဒရုန်းများစေလွှတ်ကာ ပြည်သူ့တော်လှန်ရေးအဖွဲ့အစည်းများကို ထောက်လှမ်းခဲ့သည်။

ထို့နောက် နံနက် ၉ နာရီခန့်အချိန်တွင် စစ်ကောင်စီတပ်သားအင်အား ၅၀ ကျော်ခန့်သည် မှန်တောရွာဆီသို့ ခြေလျင်ချီတက်လာပြီး မှန်တောရွာအတွင်းရှိနေအိမ်များကို မွှေနှောက်ဖျက်စီးကာ အဖိုးတန်ပစ္စည်းများကို ယူဆောင်သွားကြသည်။

၎င်းတို့ ပြန်ထွက်လာချိန်တွင် ကမ်းပါးနီတံတားဘက်ဆီသို့ ဂန့်ဂေါ-ကလေးလမ်းမကြီးမှသာမက တောလမ်း များကိုပါ အသုံးပြု စစ်ကြောင်းဖြန့်ပြီး လျှောက်လာခဲ့ကြရာ CDF – KKG တပ်ဖွဲ့ဝင်များ ထောင်ထားသည့် တိုက်မိုင်းများကို တိုက်မိပြီးနောက် လက်နက်ငယ်များဖြင့် ရမ်းသမ်းပစ်ခတ်ခဲ့သည်။

Public Service Announcement

ထိုစဥ် အသင့်နေရာယူထားပြီးဖြစ်သည့် CDF – KKG တပ်ဖွဲ့ဝင်များနှင့် အပြန်အလှန်ပစ်ခတ်ကာ ၃နာရီကျော် ကြာမြင့်ခဲ့သည့် တိုက်ပွဲအတွင်း စစ်ကောင်စီတပ်ဖွဲ့ဝင်များသည် CDF – KKG တပ်ဖွဲ့ဝင်များထောင်ထားသည့် တိုက်မိုင်းများကို လေးကြိမ်တိုင် တိုက်မိခဲ့ရာ တိုက်မိုင်းလေးခုလုံးအောင်မြင်စွာပေါက်ကွဲခဲ့သည်ဟု ဆိုသည်။

တိုက်ပွဲအတွင်းCDF – KKG တပ်ဖွဲ့ဝင်များ၏ လက်နက်ကြီး၊လက်နက်ငယ်များဖြင့် တန်ပြန်ပစ်ခတ်တိုက်ခိုက်မှု များကြောင့် စစ်ကောင်စီတပ်ဖွဲ့ဝင်များသေဆုံးမှုများနိုင်ကာ ထိခိုက်ဒဏ်ရာရမှုများလည်းရှိမည်ဟု CDF KKG က ခန့်မှန်းသည်။

အကြမ်းဖက်စစ်ကောင်စီတပ်သားများ သေဆုံးဒဏ်ရာရရှိမှုကို အတည်ပြုနေဆဲဖြစ်ပြီး CDF – KKG တော်လှန်ရေး တပ်ဖွဲ့ဝင်များမှာမူ အထိအခိုက်မရှိ ဆုတ်ခွာနိုင်ခဲ့ကြောင်း အသိပေးထားသည်။