မတူပီ – ပလက်၀ လမ်းမပေါ်ရှိ စစ်ကောင်စီတပ်စွဲထားသောထယ်ဘွေး တပ်စခန်းကို ယနေ့နံနက်မှ စတင်တိုက်ခိုက်လျက်ရှိကြောင်း မတူပီမြို့နယ်ချင်းဒေသကာကွယ်ရေးတပ်ဖွဲ့(CDF) ပြောရေးဆိုခွင့်ရှိသူက ပြောသည်။
“မနက် ၇နာရီခွဲမှာ ဖြစ်နေတာ။ အခုလည်း ပစ်နေတုန်းဆိုတော့ နောက်ဆက်တွဲ ထိခိုက် ဒဏ်ရာရတဲ့ ဟာတွေကိုတော့ နောက်ဆက်တွဲ သတင်းထုတ်ပြန်မှ အတည်ပြုနိုင်မယ်။ လောလောဆယ် အခြေအနေက ရှေ့တန်းစစ်မြေပြင် ဖြစ်တော့ နည်းနည်းဆက်သွယ်မှု ပြတ်နေလို့ပါ”ဟု ၎င်းက ဆိုသည်။
ယင်းတပ်စခန်းသည် စစ်အာဏာရှင်၏ တပ်စခန်းဖြစ်၍ ပြည်သူလူထု လုံခြုံရေးအပိုင်း နှင့် CDF တပ်များ နယ်မြေစိုးမိုးနိုင်ရေးအတွက် ဝင်ရောက်တိုက်ခိုက်ခြင်းဖြစ်သည်ဟု မတူပီ CDF ပြောရေးဆိုခွင့်ရှိသူက ပြောသည်။
ထယ်ဘွေးတပ်စခန်းသည် မတူပီ – ပလက်၀ နယ်စပ်တွင်ရှိပြီး စစ်ကောင်စီတပ်မှ အင်အား ၄၀ ခန့်ရှိနိုင်ကြောင်း မတူပီ CDFက ခန့်မှန်းသည်။စစ်အာဏာရှင်အမြစ်ပြတ် ချေမှုန်းနိုင်ရေး ဆောင်ရွက်နေခြင်းဖြစ်၍ ပြည်သူလူထုက ကာကွယ်ရေးတပ်ဖွဲ့များနောက်မှ ရပ်တည်ပေးကြရန် တိုက်တွန်းလိုကြောင်း မတူပီ CDF ပြောရေးဆိုခွင့်ရှိသူက ပြောသည်။
Public Service Announcement
