ကရင်နီ(ကယား)ပြည်နယ် လွိုင်ကော်မြို့ပေါ်အား အကြမ်းဖက်စစ်ကောင်စီက ယမန်နေ့( ဇန်နဝါရီ ၁၁)ညနေတွင် တိုက်လေယာဥ်များဖြင့် တိုက်ခိုက်ခဲ့သဖြင့် အရပ်သားပြည်သူများ၏အိမ် ၇ လုံး မီးလောင်ပျက်စီးသွားသည်ဟု ဒေသခံများက ပြောသည်။
စစ်ကောင်စီက လွိုင်ကော်မြို့ ဒေါအူခူနှင့်မိုင်းလုံးရပ်ကွက်ကို ဇန်နဝါရီ ၁၁ရက် ညနေ ၅ နာရီ မိနစ် ၄၀ တွင် တိုက်လေယာဥ်ဖြင့် ကိုးကြိမ်တိုင်သွားရောက်တိုက်ခိုက်ခဲ့သည်။
မိုင်းလုံရပ်ကွက်ရှိ နေအိမ်၇ လုံး မီးလောင်သွားခဲ့ပြီး အရပ်သားများသည် ဘေးလွတ်ရာသို့ တိမ်းရှောင်နေရကြောင်းဒေသခံများက ပြောသည်။
ယမန်နေ့ ညနေတိုက်ခိုက်မှုတွင် ဒေါဥခူရပ်ကွက်ရှိ စနေအသင်းဘုရားကျောင်းပြိုကျခဲ့ပြီး အရပ်သားများ ပိတ်မိနေသည်ဟု ဒေသခံများကပြောသော်လည်း ယနေ့နံနက် တွင်သွားရောက်ကြည့်ရှုရာ ဘုရားကျောင်းထိခိုက်ခြင်းမရှိခဲ့ဟုဒေါဥခူရပ်ကွက်နေပြည်သူတစ်ဦးကပြောသည်။
Public Service Announcement
“မနေ့ကပစ်ခတ်ခံနေရတဲ့အချိန်မှာ လူတွေကလည်း ကြောက်နေကြရ။ တစ်ယောက်ကိုတစ်ယောက်လည်း စိတ်ပူနေကြရတော့ သတင်းတွေက အမျိုးမျိုး ထွက်ခဲ့တာ။ ဒီမနက်သွားကြည့်တော့ ဘုရားကျောင်းမထိဘူး။ ဘုရားကျောင်းနားကိုတော့ပစ်တယ်။ အခုတော့ ဘုရားကျောင်းထဲ ဘယ်သူမှမနေရဲကြတော့ဘူး” ဟု ဒေသခံအမျိုးသမီးတစ်ဦးက ပြောသည်။
ယမန်နေ့က တိုက်ပွဲတွင် စစ်ကောင်စီက ရဟတ်ယာဥ်များပင် မသုံးတော့ဘဲ တိုက်လေယာဥ်များဖြင့်တိုက်ခိုက်ခဲ့သော်လည်း စစ်ကောင်စီတပ်အထိနာအောင် ပြည်သူ့ကာကွယ်ရေးတပ်ဖွဲ့များဘက်က တုန့်ပြန်နိုင်ခဲ့သည်။
ဇန်နဝါရီ ၁၁ ရက်လွိုင်ကော်မြို့ တိုက်ပွဲတွင်စစ်ကောင်စီတပ်မှ ၂၀ဦး သေဆုံးပြီး သုံးဦးကိုအရှင်ဖမ်း မိခဲ့ကာ၊လက်နက်ကြီး ၊လက်နက်ငယ်၊ခဲယမ်းများကိုလည်းသိမ်းဆည်နိုင်ခဲ့ကြောင်း ကရင်နီအမျိုးသားကာကွယ်ရေးတပ်(KNDF)က ထုတ်ပြန်သည်။
