နယ်စပ်ဖြတ်ကျော် နေရပ်စွန့်ခွာအရပ်သားများ၏ အရေးပေါ်အကာအကွယ်ပေးရေးလိုအပ်ချက်များကို ဖြေရှင်းဆောင်ရွက်မည်ဟု ထိုင်းဝန်ကြီးချုပ် ပရာယွတ်က ကတိပြုပြောကြားသည်။
ကုလသမဂ္ဂအထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် နိုလင်း ဟေးဇာသည် ဘန်ကောက်မြို့သို့ရောက်ရှိနေပြီး ထိုင်းဝန်ကြီးချုပ်နှင့် မြန်မာ့အရေးကိုတွေ့ဆုံ ဆွေးနွေးစဉ် ယင်းသို့ ပြောကြားခြင်းဖြစ်သည်။
“ဝန်ကြီးချုပ်နဲ့တွေ့ဆုံမှုမှာ မြန်မာနိုင်ငံအခြေအနေ ပိုမိုဆိုးရွားလာမှုကို တားဆီးရေး ချက်ချင်း အရေးယူမှုနဲ့ ပူးပေါင်းဆောင်ရွက်မှုတွေ လုပ်ဆောင်ဖို့၊ မြန်မာပြည်သူများ အထူးသဖြင့် ထိခိုက်အလွယ်ဆုံးသူတွေရဲ့ အရေးတကြီးလိုအပ်ချက်တွေကို ဖြေရှင်းဖို့ ကျွန်မတိုက်တွန်းခဲ့ပါတယ်” ဟု ကုလအထူးကိုယ်စားလှယ်က ထုတ်ပြန်သည်။
ထိုင်းဝန်ကြီးချုပ်သည် မြန်မာပြည်ပဋိပက္ခပိုမိုဆိုးရွားလာမှု တားဆီးရာတွင် အရေးကြီးသည့် အခန်းကဏ္ဍတွင် ရှိနေကြောင်း ကုလသမဂ္ဂက ထုတ်ပြန်သည်။
Public Service Announcement
အထူးကိုယ်စားလှယ်၏ အားလုံးပါဝင်ပြီး ပြည်သူများ၏ဆန္ဒကို ထင်ဟပ်သည့် မြန်မာနိုင်ငံဦးစားပေးလုပ်ငန်းစဉ်ကိုလည်း ထိုင်းဝန်ကြီးချုပ်က ကြိုဆိုခဲ့ပြီး မကြာသေးမီက အာဆီယံ၊ အာဆီယံအထူးကိုယ်စားလှယ်တို့နှင့် တွေ့ဆုံမှုများ၊ ပူးပေါင်းဆောင်ရွက်မည့်ကိစ္စရပ်များကို ဆွေးနွေးခဲ့ကြောင်း ထုတ်ပြန်ချက်၌ ဖော်ပြသည်။
