စစ်တပ်အာဏာသိမ်းမှု (၁)နှစ်ပြည့်သည့် ဖေဖော်ဝါရီ ၁ရက်တွင် ပြုလုပ်မည့် Silent Strike ဖြင့်တော်လှန်ရင်း Red Campaign ၌ ဆက်လက်ပါဝင်ပြီး တော်လှန်ပြည်သူအဖြစ် တာဝန်ကျေပွန်ကြရန် လူထုလှုပ်ရှားမှု သပိတ်ကော်မတီများက တိုက်တွန်းသည်။
ရန်ကုန်သပိတ်စစ်ကြောင်း ဦးဆောင်ကော်မတီက “တစ်နိုင်ငံလုံးဆွေးဆွေးနီ တော်လှန်ရေးတစ်နှစ်ပြည့်ပြီ”ဟု ကြွေးကြော်ထားပြီး အထွေ ထွေသပိတ်ကော်မတီ(GSC)ကမူ “အလံမလိပ် အသံမတိတ် လူထုလွတ်မြောက်ရေးသပိတ်”နှင့် ဖေဖော်ဝါရီ ၁ ရက်မှ ၇ ရက်အထိကို “နီတဲ့သွေး ရက်သတ္တပတ်”ဟု ဖော်ညွှန်းထားသည်။
“ဖေဖော်ဝါရီ ၁ ရက်နေ့မှာ မတရားအာဏာသိမ်းမှုတစ်နှစ်ပြည့်အနေနဲ့ Silent Strike ကိုဆင်နွှဲကြမှာဖြစ်သလို စစ်ခွေးများကလည်း ထိုနေ့မှာ စည်ကားစေဖို့၊ ဆိုင်တွေပြန်ဖွင့်စေဖို့ နည်းမျိုးစုံနဲ့ ပြည်သူလူထုကိုဖိအားပေးပြီး အဟန့်အတားဖြစ်ဖို့ပြုလုပ်နေတာကိုတွေ့ကြရမှာဖြစ်ပါတယ်”ဟု ရန်ကုန်သပိတ်စစ်ကြောင်း ဦးဆောင်ကော်မတီက ဖော်ပြသည်။
Silent Strike တွင် ပါဝင်ဆင်နွှဲချိန်မှာ နံနက် ၁၀ နာရီမှ ညနေ ၄ နာရီအတွင်းဖြစ်ပြီး အစီအစဥ်မစခင်နှင့် ပြီးဆုံးသောအချိန်များတွင် သွားလာရင်း လမ်းပေါ်သို့ အနီရောင်ဆေးပက်ဖြန်းခြင်း၊ အနီရောင်စက္ကူများကြဲချခြင်း၊ အနီရောင်အရည် (သို့) အမှုန့်များကြဲချခြင်း စသည့်ပုံစံများဖြင့်လည်း ပါဝင်နိုင်ကြောင်း နှိုးဆော်ထားသည်။
Public Service Announcement
ထို့အပြင် ပြည်သူလူထုအနေနှင့် Social Media တွင် အနီရောင်ဓာတ်ပုံ Profile များပြောင်းလဲခြင်း၊ အနီရောင် Cover Photo ပြောင်းလဲခြင်း၊ အနီရောင်အဝတ်အစားဖြင့် ဓာတ်ပုံရိုက်တင်ခြင်း အစရှိသောပုံစံများဖြင့် Silent Strike တွင် ပါဝင်နိုင်ကြောင်း တိုက်တွန်းသည်။
GSC ကလည်း “ရဲဘော်တို့ သွေး၊ ချွေး၊ အ သက်၊ ဘ၀ပေါင်းများစွာ ရင်းနှီးထားရပေမယ့် ကျနော်တို့ရဲ့ လူထုလွတ်မြောက်ရေးတိုက်ပွဲက လမ်းတစ်ဝက်မှာပဲ ရှိပါသေးတယ်။ ဒီတိုက်ပွဲကို အဆုံးသတ်နိုင်ဖို့ဆိုရင် အလံတွေကို လွှင့်ပြီး အသံတွေကို ဒီထက် ပိုမြှင့်ဖို့ မဖြစ်မနေ လိုအပ်တယ်ဆိုတာ ကျနော်တို့အားလုံး နားလည်လက်ခံထားပါတယ်။ ဒီလို အာဏာသိမ်း တစ်နှစ်ပြည့်မြောက်တဲ့ကာလက ရဲဘော်တို့ ကျနော်တို့ရဲ့တိုက်ပွဲအရှိန်ကို အဘက်ဘက်ကနေ အရှိန်အဟုန်မြှင့်ရမယ့် အချိန်ဖြစ်ပါတယ်”ဟု ထုတ်ပြန်သည်။
ပြည်သူအပေါင်းအနေဖြင့် စစ်အာဏာရှင်ဖက်ဆစ်လူရမ်းကားများအား ဆန့်ကျင်သည့်အသံကို ကျယ်လောင်စွာ ဟစ်အော်ဖို့၊ အိမ်တံခါးများကိုဖွင့်ပြီး နားများစွင့်ထားကြရန်နှင့် ထိုရက် သတ္တပတ်အတွင်း တော်လှန်သွေးမအေးကြောင်းပြသမည့် လူထုတစ်ရပ်လုံးပါဝင်နိုင်သော ဖက်ဆစ်ဆန့်ကျင်ရေး လှုပ်ရှားမှုများ၌ ပါဝင်ရန် တပ်လှန့်ထားသည်
