စစ်အာဏာရှင်စနစ်ကိုဆန့်ကျင်သည့်အနေဖြင့် မိမိကိုယ်ကို မီးရှို့ဆန္ဒပြခဲ့သည့် ကျဆုံးသူရဲကောင်း တစ်ဦးဖြစ်သူ ကိုအောင်အောင်၏ ကျန်ရစ်သူဇနီးနှင့် သားမီးများကို ကူညီဖေးမစောင့်ရှောက်ကြရန် ကျောက်ပန်းတောင်းမြို့နယ်သူ မြို့နယ်သားများအား တိုက်တွန်းကြောင်း ကျောက်ပန်းတောင်းမြို့နယ်ပြည်သူ့အုပ်ချုပ်ရေးအဖွဲ့ (ပအဖ)က ယနေ့ထုတ်ပြန်သည်။
ကျောက်ပန်းတောင်းမြို့နယ် ပြည်တော်သာရပ်ကွက်နေ ကိုအောင်မြင့်မြတ် ခေါ် ကိုအောင်အောင်သည် ဖေဖော်ဝါရီ ၁ရက်တွင် ကျောက်ပန်းတောင်း လျှပ်စစ်ရုံးရှေ့တွင် မိမိကိုယ်ကိုယ် မီးရှို့၍ ဆန္ဒပြခဲ့သည်။ ကိုအောင်အောင်သည် “အများပြည်သူ ပြည်သားများ ၂၄နာရီ မီးလင်းပါစေ ၊ ၂၀၀၂ ၊၂၀၀၂ ကို ပြန်မသွား” ဟူ၍ စာရေးသား၍ ဆန္ဒထုတ်ဖော်ခဲ့သည်။
အကြမ်းဖက်စစ်ကောင်စီအား ပြတ်ပြတ်သားသား ဆန့်ကျင်ရာတွင် အကြမ်းမဖက် အာဏာဖီဆန်ရေးနည်းတွင်မှ အဆုံးစွန်ဆုံးသောနည်းလမ်းအား ရွေးချယ်ထုတ်ဖော်သွားခဲ့သော ကိုအောင်မြင့်မြတ် (ခ)ကိုအောင်အောင် အတွက် များစွာ ကြေကွဲဝမ်းနည်းရသည်ဟု ကျောက်ပန်းတောင်းမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။
ကိုအောင်မြင့်မြတ်(ခ) ကိုအောင်အောင်အား ကျောက်ပန်းတောင်းမြို့ နွေဦးတော်လှန်ရေး၏ အာဇာနည်သူရဲကောင်းတစ်ဦးအဖြစ် မှတ်တမ်းတင် ဂုဏ်ပြုကြောင်း၊ မြို့နယ်ပြည်သူ့အုပ်ချုပ်ရေး အဖွဲ့နှင့် ကျောက်ပန်းတောင်းမြို့နယ်ရှိ တော်လှန်ရေး အင်အားစုများ အနေဖြင့် ကိုအောင်မြင့်မြတ် (ခ) ကိုအောင်အောင် ၏ ဆန္ဒ အချည်းနှီးမဖြစ်စေရဟု ကတိကဝတ်ပြုကြောင်း ဖော်ပြထားသည်။
Public Service Announcement
စစ်အာဏာရှင်ကို အမြစ်ပြတ် ဖြုတ်ချပြီး တိုင်းရင်းသားအားလုံးနှင့် တကွ အများပြည်သူများ၏ အခွင့်အရေးများကို တိုးတက်ကောင်းမွန်စေမည့် ဖက်ဒရယ် ဒီမိုကရေစီ ပြည်ထောင်စု သစ် ဆီသို့ အမြန်ဆုံးရောက်ရှိအောင် တိုက်ပွဲဝင်သွားမည်ဟု ကတိသစ္စာပြုအပ်ပါသည်ဟုလည်း ထုတ်ပြန်ခဲ့သည်။
၈၈မျိုးဆက်ကျောင်းသားခေါင်းဆောင် ဦးမင်းကိုနိုင်ကလည်း ကိုအောင်အောင် အတွက် ကဗျာရေးသား၍ ဂုဏ်ပြုခဲ့သည်။
“ဒီမြေကို ချစ်ခြင်းအတွက်၊
ကိုယ့်ခန္ဓာကိုယ်၊ လောင်ကျွမ်းခံပြနေချိန်မှာ
ချစ်သော ကမ္ဘာကြီးရေ
မြင်ကြား ခံစားတက်ရဲ့လားလို့ သူမေးသွားမှာပဲ
ချစ်သော ပြည်သူတွေ ထိုက်တန်ရဲ့လားလို့
သူမေးသွားမှာပဲ”
ဟု ဦးမင်းကိုနိုင်က ရေးသားဂုဏ်ပြုထားသည်။
