● ချင်းပြည်နယ်တွင် ကိုးလကျော်အတွင်းစစ်ကောင်စီတပ် ၁၂၂၅ ဦးသေဆုံး
ချင်းပြည်ပူးပေါင်းကာကွယ်ရေးကော်မတီ(CJDC) အဖွဲ့ဝင် ချင်းလက်နက်ကိုင်တပ်များနှင့် အာဏာသိမ်းစစ်ကောင်စီတပ်တို့ ဇန်နဝါရီလအတွင်း တိုက်ပွဲ ၇၁ကြိမ်ဖြစ်ခဲ့ပြီး စစ်ကောင်စီတပ်မှ ၁၉၇ဦး သေဆုံးကြောင်း CJDFက ယနေ့ ထုတ်ပြန်သည်။
CJDCအဖွဲ့ဝင် တပ်များနှင့် စစ်ကောင်စီတပ်တို့သည် ချင်းပြည်နယ် ထန်တလန်မြို့နယ်တွင် တိုက်ပွဲ ၁ကြိမ်၊ ဖလမ်းတွင် ၁၃ကြိမ်၊ မင်းတပ်တွင် ၁၄ကြိမ်၊ မတူပီတွင် ၂၉၊ ကန်ပက်လက်တွင် ၃ကြိမ်၊ တီးတိန် ၈ကြိမ်၊ တွန်းဇံတွင် ၂ကြိမ်၊ ပလက်၀တွင် ၁ကြိမ် တိုက်ပွဲဖြစ်ခဲ့သည်။ အဆိုပါ တိုက်ပွဲ အရေအတွက်တွင် တိုက်ပွဲငယ်များ စာရင်းကို ထည့်သွင်းထားခြင်းမရှိကြောင်း ဖော်ပြသည်။
အဆိုပါတိုက်ပွဲများ၌ ချင်းလက်နက်ကိုင်တပ်ဖွဲ့ဝင် ၁၈ဦးကျဆုံးပြီး ၂၀ဦးဒဏ်ရာရရှိခဲ့ကာ စစ်ကောင်စီ၏ အကြမ်းဖက်သတ်ဖြတ်မှုများကြောင့် ပြည်သူ ၁၃ဦးသေဆုံးကာ ၁၅ဦး ဒဏ်ရာရခဲ့သည်ဟု ဆိုသည်။
စစ်ကောင်စီတပ်မှာ ၁၉၇ဦးသေဆုံးပြီး ၆၈ဦး ဒဏ်ရာရရှိခဲ့ကြောင်း၊စစ်ကောင်စီဘက်မှ ဒဏ်ရာရ စာရင်းသည် ပိုမိုများပြားနိုင်ချေရှိကြောင်း ထုတ်ပြန်သည်။
ငြိမ်းချမ်းစွာဆန္ဒပြသောပြည်သူများကို စစ်ကောင်စီကပစ်ခတ်သတ်ဖြတ်အကြမ်းဖက်ခဲ့သဖြင့် ချင်းပြည်နယ်တွင် ၂၀၂၁ ဧပြီ ၂၄ ရက်မှစ၍ ပြည်သူများက ရရာလက်နက်ဆွဲကိုင်၍ ၊ချင်းတိုင်းရင်းသားလကွနက်ကိုင်အဖွဲ့များထံစစ်ပညာသင်ယူတိုက်ခိုက်ခဲ့ရာ ဒီဇင်ဘာ လကုန်အထိ့ စစ်ကောင်စီတပ်မှ ၁၀၂၈ ဦးသေဆုံးခဲ့သည်။ထိုကြောင့် ဧပြီ လမှ ဇန်နဝါရီလကုန်အထိ့ချင်းပြည်နယ်တစ်ခုတည်းတွင် စစ်ကောင်စီတပ်ဖွဲ့ဝင် ၁၂၂၅ ဦးသေဆုံးခဲ့ပြီး ရာပေါင်းများစွာဒဏ်ရာရရှိခဲ့သည်။
ချင်းလက်နက်ကိုင်အဖွဲ့များ ၊ပြည်သူ့ကာကွယ်ရေးတပ်များမှ စုစုပေါင်း ၇၅ ဦး ပြည်သူနှင့် နိုင်ငံတော်အတွက် အသက်ပေးလှူခဲ့ရသည်။ ထိုအပြင် အကြမ်းဖက်စစ်ကောင်စီတပ်များ၏ ပစ်ခတ်သတ်ဖြတ်မှုကြောင့် ပြည်သူ ၄၀ သေဆုံးခဲ့ကြောင်း CJDC ကထုတ်ပြန်သည်။
မင်းအောင်လှိုင် ဦးဆောင်သော အကြမ်းဖက် စစ်ကောင်စီများသည် ချင်းပြည်နယ်အား အင်အား အလုံးအရင်းဖြင့် ထိုးစစ်ဆင်လျက်ရှိသော်လည်း ၎င်းတို့၏ ထိုးစစ်ဆင်မှုအား ချင်းအမျိုးသားတပ်မတော်(CNA) အပါအဝင် ပြည်သူ့ကာကွယ်ရေးတပ်များ၊ ပူးပေါင်းတပ်ဖွဲ့များ ဖြင့် ပြန်လည်ခုခံတိုက်ခိုက်ခဲ့ခြင်းဖြစ်သည်ဟုဆိုသည်။
CJDF ကို ချင်းအမျိုးသားတပ်မတော်၊ ချင်းကာကွယ်ရေးတပ်(CDF) အပါအဝင် ချင်းပြည်နယ် ဒေသအသီးသီးရှိ ကာကွယ်ရေးတပ်များ စုပေါင်းဖွဲ့စည်းထားခြင်းဖြစ်သည်။