ထိုင်းနိုင်ငံထဲ တရားမဝင်နယ်စပ်ဖြတ်ကျော်မှုနဲ့ဖမ်းဆီးခံရလို့ ပြည်နှင်ဒဏ်ပေးခံရမယ့် မြန်မာနိုင်ငံသားတစ်ဦးဟာ ထိန်းသိမ်းထားတဲ့ ရဲစခန်းမှာ ကြိုးဆွဲချသွားတယ်လို့ ဘန်ကောက်ပို့စ်သတင်းစာကဖော်ပြပါတယ်။
ဒီဖြစ်ရပ်ဟာ ဖရာပရာဒန် ခရိုင် ရဲစခန်းမှာ မနေ့က မနက်အစောပိုင်းဖြစ်ပွားခဲ့တာပါ။ ကိုယ့်ကိုယ်ကို ကြိုးဆွဲချသတ်သေသွားတဲ့ မြန်မာအမျိုးသားဟာ အသက် ၃၅ နှစ်ရှိပါပြီ ။
အဆုံးစီရင်သွားတဲ့မြန်မာအမျိုးသားဟာ ပြီးခဲ့တဲ့နှစ် နိုဝင်ဘာလလယ်ပိုင်းက ထိုင်းနိုင်ငံထဲတရားမဝင်ဖြတ်ကျော်ဝင်ရောက်မှုနဲ့ ဖမ်းဆီးခံခဲ့ရတာပါ။ ဖမ်းခံရချိန်မှာ မူးယစ်ဆေးဝါးကိုလည်းလက်ဝယ်တွေ့ရှိခဲ့ရတယ်လို့ ဘန်ကောက်ပို့စ်က ဆိုထားပါတယ်။
အဲဒီနောက် ပြည်နှင်ဒဏ်ပေးဖို့ သူ့ကို ရဲစခန်းမှာထိန်းသိမ်းထားတာပါ။ မနေ့က မနက်ပိုင်း ၂ နာရီခွဲလောက်မှာတော့ ရဲစခန်း တာဝန်ကျကင်းသမားက အချုပ်ခန်းကိုသွားကြည့်ရာမှာ ဘောင်းဘီရှုံ့ကြိုးသုံးကာ ကြိုးဆွဲချ သေဆုံးသွားတာကိုတွေ့ခဲ့ရတယ်လို့ သိရပါတယ်။
အလောင်းကို စစ်ဆေးမှုတွေလုပ်ပြီး ဘန်ချက်ဆေးရုံကို ပို့ဆောင်ထားပါတယ်။ ဒါပေမယ့် အခင်းဖြစ်တဲ့နေရာ ဝန်းကျင်ကို လုံခြုံရေးကင်မရာဟာလွှမ်းခြုံမှုမရှိတာကြောင့် စစ်ဆေးမှုတွေလုပ်သွားမယ်လို့ လည်းသိရပါတယ်။
ကနဦးအနေနဲ့ မြန်မာအမျိုးသားဟာ စိတ်ဖိစီးမှုတွေ ဒဏ်ကြောင့် ကိုယ့်ကိုယ်ကို အဆုံးစီရင်သွားတာဖြစ်နိုင်တယ်လို့ကောက်ချက်ချထားကြပါတယ်။
(မြန်မာအမျိုးသားကြိုးဆွဲချသွားတဲ့အချုပ်ခန်းကို ထိုင်းရဲတပ်ဖွဲ့ဝင်တွေစစ်ဆေးနေစဉ်)