ယင်းမာပင်နှင့် ပုလဲမြို့နယ်ကြားဖြစ်ပွားသည့် တိုက်ပွဲတွင် အကြမ်းဖက်စစ်တပ်က အထိနာနေသဖြင့် လေကြောင်းပစ်ကူ အသုံးပြုနေကြောင်း ပုလဲပြည်သူ့ကာကွယ်ရေးတပ်ဖွဲ့ တာဝန်ရှိသူတစ်ဦးက လူထုနွေဦးသို့ ပြောသည်။
ယနေ့(ဖေဖော်ဝါရီ ၁၆)နေ့လည် ၁နာရီခန့်က စတင်ဖြစ် ပွားခဲ့သော နှစ်ဖက်ထိတွေ့တိုက်ပွဲ၌ စစ်ကောင်စီတပ်သားများ ထိခိုက်သေဆုံးသူများပြားသည်ဟုလည်း ၎င်းက ဆိုသည်။
“ပုပ္ပါကျေးရွာက ဆင်းလာတဲ့ စစ်ခွေးတပ်ကို ပုလဲပြည်သူ့ကာကွယ်ရေးတပ်ဖွဲ့တွေနဲ့ ယင်းမာပင်ပြည်သူ့ကာကွယ်ရေးတပ်ဖွဲ့တွေ ပူးပေါင်းပြီး စောင့်တိုက်တာ။စစ်ခွေးတွေက အထိလည်းနာရော ရဟတ်ယာဥ်ရောက် လာတယ်။တိုက်ပွဲက အခု ဖုန်းပြောချိန်(ည ၇ နာရီ ခွဲ)ထိ မပြီးသေးဘူး။ကျွန်တော်တို့ဘက်က တစ်ယောက်ထိထားတယ်”ဟု အထက်ပါတာဝန်ရှိသူက ရှင်းပြသည်။
ပုပ္ပါကျေးရွာသို့ အကြမ်းဖက်စစ်ကောင်စီတပ်က အင်အား ၅၀နှင့်အထက်ဖြင့် တပ်စွဲထားသည်မှာ သုံးရက်ခန့် ကြာမြင့်နေပြီး ယနေ့တွင် ပုလဲမြို့နယ်ဘက်သို့ စစ်ကြောင်းစထိုးလာခြင်း ဖြစ်သည်။
နောက်ဆက်တွဲ သတင်းများကို ပုလဲမြို့နယ်ပြည်သူ့ကာကွယ်ရေးတပ်ဖွဲ့က ဆက်လက်ထုတ်ပြန်မည်ဟုလည်း ဆိုသည်။
ယင်းမာပင်နှင့် ပုလဲဒေသရှိ ပြည်သူ့ကာကွယ်ရေးတပ်ဖွဲ့များသည် အကြမ်းဖက်စစ်ကောင်စီတပ်ကို အားကောင်းစွာဖြင့် ခုခံတိုက်ခိုက်နေသော ဒေသများဖြစ်သည်။