စစ်ကိုင်းတိုင်း၊ မုံရွာမြို့နယ်၊ ထနောင်းတောမြောက်ရွာမှ CDM ကျောင်းဆရာမတစ်ဦး၏နေအိမ်သို့ အကြမ်းဖက်စစ်ကောင်စီတပ်မှ ဝင်ရောက်ဖျက်ဆီးသွားပြီး “လွတ်အောင်ပြေးထား”ဟုခြိမ်းခြောက်စာများ ရေးသွားခဲ့ကြောင်း ဒေသခံများကပြောသည်။
ယနေ့ (ဖေဖော်ဝါရီလ ၂၆ရက်နေ့)နံနက်ပိုင်းကမုံရွာမြို့နယ်၊ ထနောင်းတောမြောက်ရွာမှ CDM ပြုလုပ်ထားသည့် ကျောင်းဆရာမတစ်ဦး၏ နေအိမ်ကို စစ်ကောင်စီတပ်သားများက ဝင်ရောက်ကာ အိမ်တွင်းပစ္စည်းများ ဖျတ်ဆီးသွားပြီး အုတ်တံတိုင်းနှင့် အိမ်နံရံများတွင် ခြိမ်းခြောက်သည့်စာများ ရေးသွားကြောင်း မုံရွာ_အမြင့်လမ်းသတင်းမှန်ပြန်ကြားရေးအဖွဲ့က အသိပေးသည်။
“ဒလန်သတင်းပေးနဲ့ အတိအကျဝင်သွားတာ။ ဆရာမ နဲ့ သူ့မိသားစု က လွတ်သွားတယ်။ဒါပေမယ့် အိမ်ကို ရစရာမရှိအောင် ဖျက်ဆီးခံခဲ့ရတယ်”ဟု မုံရွာမြို့နေသူတစ်ဦးက ပြောသည်။
အကြမ်းဖက်စစ်ကောင်စီတပ်သည် CDM ဆရာမ၏နေအိမ်ဝင်းတွင် “လွတ်အောင် ပြေးထား”ဆိုသည့်ခြိမ်းခြောက်စာသားများအပြင် အခြားရိုင်းစိုင်းသည့် စာသားများကိုလည်းရေးသားသွားသည်ကိုတွေ့ရသည်။
Public Service Announcement
CDM ဆရာမတစ်ဦးနေအိမ်မှ အိမ်တွင်းပစ္စည်းများအားလုံး ရိုက်ခွဲဖျတ်ဆီးသွားခဲ့ပြီး ရေခဲသေတ္တာတစ်လုံး နှင့် TVအကြီးတစ်လုံးကိုလည်း စစ်ကောင်စီတပ်များက ယူဆောင်သွားကြောင်း၊စစ်ကောင်စီတပ်များသည် အပြန်လမ်းတွင်လည်း ညောင်ပင်ဇောက်ကျောက်ပေါက်အနီးအနားရှိ တဲအိမ်နှစ်လုံးကိုလည်း ထပ်မံမီးရှို့သွားပြီး ကျောက်ပေါက်အနီး ဘုံဆိုင်မှ ဆိုင်ရှင်အား ဖမ်းခေါ်သွားကြောင်း မုံရွာ_အမြင့်လမ်းသတင်းမှန်ပြန်ကြားရေးအဖွဲ့က အသိပေးသည်။
“ထနောင်းတောက ၃ ယောက်ပါသွားတယ်ပြောတယ်။ လမ်းပြတွေကိုနောက်မှာထားပြီး CDMဆရာမအိမ်တန်းတန်းရောက်သွားလို့ ဒလန်သေချာပြထားတယ်လို့လည်း ကြားတယ်။”ဟု မုံရွာနယ်ခံတစ်ဦးက ပြောသည်။
အဆိုပါထနောင်းတောကျေးရွာအပြင် မုံရွာ -အမြင့်လမ်းပိုင်းအနီးတွင်ရှိသည့်ကျေးရွာများကိုအကြမ်းဖက် စစ်ကောင်စီတပ်များက ရမ်းသမ်းပစ်ခတ်ဝင်ရောက်ခဲ့သည်။
