ထိုင်း − မြန်မာ ကုန်သွယ်မှုမှာ ဘတ်ငွေနဲ့ကျပ်ငွေ တိုက်ရိုက်ပေးချေဖို့ စစ်ကောင်စီခွင့်ပြု
ကုန်သွယ်ရေးမှာ အမေရိကန်ဒေါ်လာအပေါ် မှီခိုတာကို လျော့ချဖို့ စစ်ကောင်စီခြေလှမ်းပြင်နေ

ထိုင်း − မြန်မာ နှစ်နိုင်ငံ ကုန်သွယ်မှုမှာ ဘတ်ငွေ နဲ့ကျပ်ငွေ တိုက်ရိုက် ပေးချေတာကို စစ်ကောင်စီရဲ့ ဗဟိုဘဏ်က ခွင့်ပြုလိုက်တယ်လို့ ဒီနေ့ ရက်စွဲနဲ့ ထုတ်ပြန်လာပါတယ်။

ဒီလိုခွင့်ပြုလိုက်တာဟာ နှစ်နိုင်ငံ ကုန်သွယ်မှုတိုးမြှင့်ဖို့နဲ့ ကုန်စည်စီးဆင်းမှု မြန်ဆန်စေဖို့ ၊ ငွေပေးချေမှုမှာလည်း အဆင်ပြေစေဖို့ ရည်ရွယ်တယ်လို့ စစ်ကောင်စီက ဆိုထားပါတယ်။

ဘတ်ငွေနဲ့ကျပ်ငွေ တိုက်ရိုက်ပေးချေတာကို ဆောင်ရွက်ခွင့်ပြု လိုက်တဲ့ဘဏ်တွေမှာ နယ်စပ်ကုန်သွယ်ရေး လုပ်ကိုင်မယ့်သူတွေရဲ့ သွင်းကုန် ပို့ကုန် ဘဏ်စာရင်းကိုဖွင့်လှစ်ခွင့်ပြုတယ်လို့လည်းစစ်ကောင်စီက ဆိုထားပါတယ်။

စစ်ကောင်စီရဲ့ခြေလှမ်းဟာ ကုန်သွယ်ရေးမှာ အမေရိကန်ဒေါ်လာ သုံးစွဲတာကိုလျော့ချလိုတဲ့သဘောဖြစ်တယ်လို့ သုံးသပ်တာတွေရှိနေပါတယ်။

Public Service Announcement

ပြီးခဲ့တဲ့ နှစ် ဒီဇင်ဘာလအတွင်းကလည်း တရုတ် − မြန်မာ နယ်စပ်ကုန်သွယ်ရေးမှာ ယွမ်ငွေနဲ့ကျပ်ငွေတိုက်ရိုက်ပေးချေတာကို စစ်ကောင်စီဘက်က ခွင့်ပြုခဲ့တာရှိပါတယ်။

အရင်က နယ်စပ်ကုန်သွယ်မှုတွေ ရဲ့ငွေပေးချေမှုတွေမှာ အမေရိကန်ဒေါ်လာကို လဲလှယ်ကာ ဆောင်ရွက်ကြတာဖြစ်ပါတယ်။