အကြမ်းဖက်စစ်ကောင်စီအား လေယာဉ်ဆီတင်သွင်းရာပေးရာတွင် ပါဝင်သူတစ်ဦးဖြစ်သူ CB ဘဏ်ဥက္ကဌကိုသတိပေးသည့် အနေဖြင့် CB Bank ATM တစ်ခုကို ဗုံးခွဲတိုက်ခိုက်ခဲ့ကြောင်း တရားမျှတမှုယူဆောင်သူအဖွဲ့ (JBF)မှတာဝန်ရှိသူတစ်ဦးက လူထုနွေဦးသို့ ပြောသည်။
“အပြစ်မဲ့ပြည်သူများကို လေကြောင်းမှ ဗုံးကြဲတိုက်ခိုက်နေသော အကြမ်းဖက်စစ်ကောင်စီအား လေယာဉ်ဆီတင်သွင်းရာတွင် ကူညီပါဝင်ဆောင်ရွက်ပေးနေသူ CB Bank ဥက္ကဌ ခရိုနီခင်မောင်အေးအား သတိပေးသောအနေဖြင့် တိုက်ခိုက်ခဲ့ခြင်းဖြစ်သည်။ဆက်လက်၍ အကြမ်းဖက်စစ်ကောင်စီအား အားပေးကူညီနေပါက ပိုမိုပြင်းထန်သော စစ်ဆင်ရေးများဖြင့် လုပ်ဆောင်တိုက်ခိုက်သွားမည်ဖြစ်ကြောင်း တရားဝင်အသိပေးကြေငြာအပ်ပါသည်”ဟု JBF အဖွဲ့က ထုတ်ပြန်ထားသည်။
မတ်လ ၆ ရက် ညနေ ၃နာရီခန့်တွင် ရန်ကုန်မြို့ လှိုင်မြို့နယ် ပါရမီလမ်းရှိ CB Bank ATM ကို ဗုံးခွဲတိုက်ခိုက်ခဲ့ခြင်းဖြစ်ပြီး ယင်းATM ပျက်ဆီးခဲ့ကြောင်း ထုတ်ပြန်ထားသည်။
အပြစ်မဲ့ပြည်သူများကို လေကြောင်းမှ ဗုံးကြဲတိုက်ခိုက်ရန် အကြမ်းဖက်စစ်ကောင်စီတပ်အတွက် လေဆီတင်သွင်းရာတွင် ကူညီပါဝင်ဆောင်ရွက်ပေးနေသော ကုမ္ပဏီ သုံးခုကို၏အမည်စာရင်းကို အမျိုးသားညီညွတ်ရေးအစိုးရ(NUG)က မတ် ၄ရက်တွင် ထပ်မံ ကြေညာခဲ့ရာ CB ဘဏ်ဥက္ကဌ ပိုင်ဆိုင်သည့် Golden Myanmar လေကြောင်းလိုင်းလည်း ပါဝင်ခဲ့သည်။
Public Service Announcement
JBF အဖွဲ့အနေဖြင့် အာဏာသိမ်းစစ်ကောင်စီ၏ အုပ်ချုပ်ရေးယန္တရား ၊ ထောက်တိုင်များ၊ ငွေကြေးထောက်ပံ့ပေးနေသည့်စီးပွားရေးလုပ်ငန်းများနှင့် ပြည်သူများ၏ အသက်၊အိုးအိမ်၊စည်းစိမ်ကို ခြိမ်းခြောက်ဒုက္ခပေးနေသောအဖွဲ့အစည်းများကို အဓိကပစ်မှတ်ထား၍ တိုက်ခိုက်မည်ဟု သတိပေးထားသည်။
ယင်းအဖွဲ့အနေဖြင့် မတ်လ ၃ ရက်က အုတ်ကျင်းဘူတာရုံလမ်းပေါ်ရှိ ယာဉ်ထိန်းရဲရုံးကို တိုက်ခိုက်ခဲ့သလို ဖေဖော်ဝါရီ ၂၈ ရက်ကလည်း Transporter Bar ကို ဗုံးခွဲ၍ သတိပေးခဲ့သည်။
