အကြမ်းဖက်စစ်ကောင်စီက သုံးဘီးဆိုင်ကယ်ဖြင့် ပြည်သူပုံစံ ပုံမှားရိုက်သွားလာနေ၍ မန္တလေး-ရွှေဘိုလမ်း၊ မန္တလေး-မုံရွာလမ်းများတွင် ပြည်သူများ မလိုအပ်ဘဲ သုံးဘီးဆိုင်ကယ်များအသုံးပြု၍ ခရီးသွားလာခြင်းရှောင်ရှားကြရန် ငါးမြို့နယ်မဟာမိတ်တပ်ပေါင်းစုကသတိပေးကြေညာသည်။
စစ်ကိုင်းတိုင်း၊ အရာတော်၊ မြင်းမူ၊ စစ်ကိုင်း၊ မုံရွာ၊ ဝက်လက် ၅ မြို့နယ် မဟာမိတ်တပ်ပေါင်းစုက ယနေ့ (မတ်လ ၉ ရက်နေ့)တွင် ကြေညာချက် တစ်စောင်ထုတ်ပြန်ခဲ့ရာအဆို
ပါကြေညာချက်တွင်အကြမ်းဖက်စစ်ကောင်စီအနေဖြင့်စစ်ကိုင်းတိုင်းကို နောက်ဆုံးအနေဖြင့် နည်းမျိုးစုံအသုံးပြုပြီး တိုက်ခိုက်ချေမှုန်းရန် ကြိုးစားလာနေကြောင်း၊စစ်ကောင်စီတပ်ဖွဲ့ဝင်များသည်ယခင်ကသွားလာရာတွင် စစ်တပ်သုံးကားများဖြင့် ယူနီဖောင်းအပြည့်အစုံဝတ်ဆင်၍ ပေါ်ပေါ်တင်တင်သွားလာသော်လည်း ယခုအခါတွင် PDF၊ LPDF၊ ပ.က.ဖတို့၏ ရွပ်ရွပ်ချွံချွံ ခုခံတိုက်ခိုက်မှုများကြောင့် စစ်သုံးကားများ အသုံးမပြုရဲခြင်း၊ စစ်ယူနီဖောင်းများ ဝတ်ဆင်ရဲခြင်းမရှိတော့ကြောင်း၊ ပြည်သူအယောင်ဆောင်ကာ အိမ်စီးကားများ၊ ဘုန်းကြီးကားများ၊ နာရေးကူညီမှုကားများ၊ ကျန်းမာရေးကူညီမှုကားများ၊ အသုံးပြုသွားလာနေကြသည်ကို တွေ့ရှိရကြောင်း အသိပေးရှင်းလင်းထားသည်။
ယခုအခါ နောက်ဆုံးအဆင့်အနေဖြင့် သုံးဘီးဆိုင်ကယ်များအသုံးပြုပြီး မန္တလေး-ရွှေဘိုလမ်း၊ မန္တလေး-မုံရွာလမ်းများကို သွားလာလှုပ်ရှားမည်ဟုသိရကြောင်း၊ ထို့ကြောင့် ပြည်သူများအနေဖြင့် မန္တလေး-ရွှေဘိုလမ်း၊ မန္တလေး-မုံရွာလမ်းများကို မလိုအပ်ဘဲ သုံးဘီးဆိုင်ကယ်များအသုံးပြု၍ ခရီးသွားလာခြင်းရှောင်ရှားကြရန်သတိပေးကြောင်း၊ မန္တလေး-ရွှေဘိုလမ်း၊ မန္တလေး-မုံရွာလမ်းများကို သုံးဘီးဆိုင်ကယ်များ အသုံးပြုသွားလာနေသည်ကို တွေ့ရှိရပါက ထိထိရောက်ရောက်တိုက်ခိုက်နှိမ်နင်းသွားမည်ဖြစ်ကြောင်း၊ကြေညာချက်တစ်စုံတစ်ရာ မထုတ်ပြန်မချင်း ပြည်သူများအနေဖြင့် ၎င်းလမ်းများကို သုံးဘီးဆိုင်ကယ်အသုံးပြုသွားလာခြင်းမပြုရန် သတိပေးထုတ်ပြန်သည်။
မန္တလေး-ရွှေဘိုလမ်း၊ မန္တလေး-မုံရွာလမ်းများတွင် အကြမ်းဖက်စစ်ကောင်စီအား ဒေသတွင်းပြည်သူ့ကာကွယ်ရေးတပ်များက မကြာခဏခုခံတိုက်ခိုက်နေကြသည်။
Public Service Announcement
