မန္တလေးတိုင်း ငါန်းဇွန်မြို့နယ်၊ မြို့သာမြို့တွင် အကြမ်းဖက်စစ်ကောင်စီက မီတာခများ ကောက်ခံရန်ပြင်ဆင်နေ၍ စစ်ကိုင်းတိုင်းမှ PDF အဖွဲ့တစ်ဖွဲ့က မြို့သာလျှပ်စစ်ရုံးအား လက်ပစ်ဗုံးဖြင့် လာရောက်ပစ်ခတ်သတိပေးသွားကြောင်း ဒေသခံများက ပြောသည်။
မြင်းခြံခရိုင်၊ ငါန်းဇွန်မြို့နယ်၊ မြို့သာမြို့ ပေါ်ရှိ လျှပ်စစ်ရုံးမှ အကြမ်းဖက်စစ်ကောင်စီလက်အောက်ခံများသည် မြို့သာပြည်သူများထံမှ မီတာကြေး ကောက်မည်ဟု သတင်းရသဖြင့် ယမန်နေ့(မတ်လ ၁၄ ရက်)ည ၇နာရီခွဲခန့် လက်ပစ်ဗုံးတစ်လုံး ပစ်ခွဲ၍ သတိပေး တားမြစ်ခဲ့ကြောင်း မြောင်မြို့နယ်၊ ပြည်သူ့ကာကွယ်ရေးတပ်ဖွဲ့ (T.G.R)က သတင်းထုတ်ပြန်သည်။
သတိပေးသည့်ကြားမှ မီတာကြေးဆက်လက်ကောက်မည်ဆိုပါက မီတာခ ကောက်ခံသူများ၏ အသက်ကို စိတ်ချရမည်မဟုတ်ဟု မြောင်မြို့နယ် ပြည်သူ့ကာကွယ်ရေးတပ်ဖွဲ့ (T.G.R)က သတိပေးသည်။
“ထိခိုက်မှုရှိမရှိတော့ မသိရသေးဘူး”ဟု T.G.R အဖွဲ့ တာဝန်ရှိသူက ပြောသည်။
မြောင်မြို့နယ် ပြည်သူ့ကာကွယ်ရေးတပ်ဖွဲ့ (T.G.R)သည် စစ်ကိုင်းတိုင်းအတွင်းသာမက မကွေးတိုင်း ရေစကြိုမြို့နယ်နှင့် မန္တလေးတိုင်း မြင်းခြံမြို့နယ်များကိုပါ ဒေသတွင်း ပြည်သူ့ကာကွယ်ရေးအဖွဲ့များနှင့်ပူးပေါင်းကာ အကြမ်းဖက်စစ်ကောင်စီတပ်များအား ခုခံတိုက်ခိုက်နေကြသည်။