ရေလယ်ကျွန်းဒေသ ပြည်သူ့ကာကွယ်ရေးတပ်ပေါင်းစု တပ်ရင်း (၃)က ယမန်နေ့(မတ်လ ၁၄ ရက်) သတိပေးကြေညာချက် တစ်စောင်ထုတ်ပြန်ခဲ့ပြီး အဆိုပါ ကြေညာချက်တွင် ရေစကြိုမြို့နယ်၊ ရေလယ်ကျွန်းဒေသအတွင်း အကြမ်းဖက်စစ်ကောင်စီ၏ ဦးပိုင်နှင့် ကျောထောက်နောက်ခံ အကျိုးတူလုပ်ငန်းများ ဖြစ်သော မြန်မာဘီယာ၊ ဒဂုန်ဘီယာ၊ အေဘီစီဘီယာ၊ RUM၊ Adaman Gold ဘီယာ၊ ဒဂုန်ဂျင်၊ မန္တလေးဘီယာ၊ Black Shield Stoutဘီယာ၊ Myanmar Premium Beer၊ Premium Gold ဆေးလိပ်၊ Red Ruby ဆေးလိပ်၊ My Tel ဆင်းကတ်နှင့် ဖုန်းဘေ၊ MEC ဆင်းကတ်နှင့် ဖုန်းဘေ၊ ဆင်မင်းဘိလပ်မြေ စသည့်ပစ္စည်းများကို သယ်ယူပို့ဆောင်ရောင်းချခြင်း၊လက်လီ လက်ကား ရောင်းဝယ်ဖောက်ကားခြင်းများ မပြုလုပ်ကြရန် မတ်လ ၂၅ ရက်နောက်ဆုံးထား ရပ်ဆိုင်းကြရန် ရေလယ်ကျွန်းတပ်ပေါင်းစုက ထုတ်ပြန်သည်။
ရေလယ်ကျွန်းဒေသအတွင်းရှိ စျေးဆိုင်များ၊ စတိုးဆိုင်များ၊ ဘီယာနှင့်အရက်ဆိုင်များအနေဖြင့် အထက်ပါပစ္စည်းများကို ၊ရောင်းချခြင်း၊ ဝယ်ယူခြင်းမပြုကြရန်၊ နောက်ဆုံးသက်မှတ်ထားသော မတ်လ ၂၅ ရက်နောက်ပိုင်းတွင် ဖော်ပြထားသော ကုန်ပစ္စည်းများအား လက်လီလက်ကား ရောင်းဝယ်ဖောက်ကားနေသော ဆိုင်များနှင့် အဆိုပါပစ္စည်းများအား သယ်ယူပို့ဆောင်ပေးသော ယာဥ်မျိုးစုံတို့အား စစ်ဆေးတွေ့ရှိရပါက ထောက်ထားငဲ့ညှာမည်မဟုတ်ဘဲ ထိရောက်ပြင်းထန်စွာ အရေးယူသွားမည်ဖြစ်ကြောင်း ရေလယ်ကျွန်းတပ်ပေါင်းစုက အသိပေးသည်။
“ရေလယ်ကျွန်း PDF အနေနဲ့ ပြည်သူလူထုနဲ့အတူ မားမားမတ်မတ်ရပ်တည်ကာ စစ်အာဏာရူးကို တွန်းလှန်တိုက်ခိုက်ပြီး ခုခံစစ်ဆင်နွှဲနေတာအတိုင်းအတာတစ်ခုသို့ ရောက်ရှိနေပြီဖြစ်ပါတယ်။ စစ်ရေးပစ်မှတ်ထားတိုက်ခိုက်နေချိန်မှာ စစ်တပ်ပိုင်ကုန်စည်များ ရောင်းချတာ သယ်ယူပို့ဆောင်တာမလုပ်ဘဲ ပူးပေါင်းဆောင်ရွက်ကြဖို့ အသိပေးပါတယ်။ ၂၅ ရက်နေ့နောက်ပိုင်း ငွေဒဏ်နဲ အတူကုန်စည်များပါ(လုံးဝ)ဖမ်းဆီးထိန်းသိမ်းပြီး ပြင်းပြင်းထန်ထန် အပြစ်ပေးသွားမယ်လို့ သတိပေးပါတယ်”ဟု ရေလယ်ကျွန်း PDFက ရေးသားသည်။
