မြန်မာ-အိန္ဒိယ နယ်စပ်ကုန်သွယ်ရေးတွင်အိန္ဒိယနိုင်ငံသုံး ရူပီးငွေကို တိုက်ရိုက်အသုံးပြုရန် စီစဉ်နေကြောင်းအကြမ်းဖက်စစ်ကောင်စီ၏ ပြန်ကြားရေးဝန်ကြီးဌာနနှင့် ရင်းနှီးမြှပ်နှံမှုနှင့်နိုင်ငံခြားစီး ပွားဆက်သွယ်ရေးဝန်ကြီးဌာနတို့က ယနေ့ ထုတ်ပြန်သည်။
အကြမ်းဖက်စစ်ကောင်စီသည်နိုင်ငံအတွင်း ဒေါ်လာမလုံလောက်မှုကို လျော့ချရန်အတွက် တရုတ်ယွမ်ငွေနှင့်ထိုင်းဘတ်ငွေတို့ကို ကုန်သွယ်မူတွင် တိုက်ရိုက်အသုံးပြုနိုင်ရန် ခွင့်ပြုပေးပြီးနောက် တတိယမြောက်နိုင်ငံခြားငွေကြေးဖြစ်သည့် ရူပီးငွေဖြင့်ပါကုန်သွယ်ရေးတွင်အသုံးပြုမည်ဟု ထုတ်ပြန်လာခြင်းဖြစ်သည်။
ထိုသို့ဆောင်ရွက်ခြင်းက နိုင်ငံအတွင်း ဒေါ်လာသုံးဆွဲမှု၇၀ ရာခိုင်နှုန်းလျော့ကျသွားရန်အတွက်ဖြစ်သည်ဟု စစ်ကောင်စီကဝါဒဖြန့်ထားသည်။ ထိုအစီအစဉ်များသည် နိုင်ငံအတွင်း ငွေသားပြတ်လပ်မှုနှင့် ဒေါ်လာဈေးမြင့်တက်မှုကြောင့် ငွေကြေးဖောင်းပွမှုကို လျှော့ချစေရန်အတွက်ဖြစ်သည်ဟု ဆိုသည်။
“ဒီလို ကိစ္စမျိုးဆိုတာ နှစ်နိုင်ငံလုံး စီးပွားရေးတန်းတူအားကောင်းနေမှအဆင်ပြေမှာ။ အခုလို ပြည်တွင်းစီးပွားရေးထိုးကျနေချိန်မှာ လုပ်တာက ငွေကြေးလွှမ်းမိုးမူတွေဖြစ်လာနိုင်တယ်။ နိုင်ငံရှေ့ရေးအတွက် အန္တရာယ်ရှိတယ်”ဟုစီးပွားရေးလုပ်ငန်းရှင်တစ်ဦးက ပြောသည်။
မြန်မာ-အိန္ဒိယ နယ်စပ်ကုန်သွယ်ရေးတွင် စစ်တွေ၊ တမူးနှင့် ရိဒ် နယ်စပ်ကုန်သွယ်ရေးစခန်းများရှိပြီး ၂၀၁၉-၂၀၂၀ ဘဏ္ဍာနှစ်တွင် နယ်စပ် ကုန်သွယ်မူ ဒေါ်လာ သန်း ၈၀၀ကျော်ရှိခဲ့သည်။ စစ်အုပ်စုက အာဏာသိမ်းပြီးနောက်ပိုင်းကျန်နိုင်ငံများနှင့် နယ်စပ်ကုန်သွယ်ရေးလျော့ကျသကဲ့သို့ပင်အန္ဒီယနှင့် နှစ်နိုင်ငံနယ်စပ်ကုန်သွယ်ရေးမှာလည်းလျော့ကျခဲ့သည်။
လက်ရှိ နယ်စပ် ကုန်သွယ်ရေးတွင် တိုက်ရိုက်ကုန်သွယ်မူတွင် ရူပီးငွေဖြင့် ပေးချေမှုများရှိသော်လည်း ဘဏ်ပေးချေမှုတွင် အမေရိကန်ဒေါ်လာကိုသာအဓိက ကြားခံအဖြစ်အသုံးပြုနေခြင်းဖြစ်သည်။