ခင်ဦးနယ်က ​ရွာ​တွေကို စစ်တပ်ဝင်စီးပြီး မီးတင်ရှို့​နေ

စစ်ကိုင်းတိုင်း ခင်ဦးမြို့နယ်တွင် အကြမ်းဖက် စစ်ကောင်စီတပ်က ကျေးရွာများသို့ ဆက်တိုက်ဝင်ရောက်နေပြီး မီးရှို့ဖျက်ဆီးမှုများ ပြုလုပ်နေကြောင်း ဒေသခံများက ပြောသည်။

အကြမ်းဖက်စစ်ကောင်စီတပ်သည် ယမန်နေ့ (မတ်လ၁၅ရက်) ညနေ ၃နာရီခန့်က နေအိမ် ၁၀၀ကျော်ရှိသော ခင်ဦးမြို့နယ် တမုတ်ကျေးရွာအား လက်နက်ကြီး၊လက်နက်ငယ်များဖြင့် ရမ်းသမ်းပစ်ခတ်ခဲ့ပြီး မီးတင်ရှို့ခဲ့ရာတွင် နေအိမ်အများအပြားပျက်စီးခဲ့ပြီး တစ်ရွာလုံး နေအိမ်၁၀လုံးခန့်သာ ကျန်ရှိတော့ကြောင်း ဒေသခံများက ပြောသည်။

ယနေ့(မတ်လ ၁၆ ရက်) နေ့လယ် ၂နာရီခန့်တွင်လည်း အကြမ်းဖက်စစ်ကောင်စီတပ်များသည် ခင်ဦးမြို့နယ် ထနောင်းကိုင်းလေး၊ ကုလားလူး၊ ရှားလွင်စသော ကျေးရွာများတွင် လက်နက်ကြီးများ ရမ်းသမ်းပစ်ခတ်ကာ ဝင်ရောက်လာခဲ့၍ ကျေးရွာပြည်သူများ ထွက်ပြေးတိမ်းရှောင်နေရကြောင်း၊ ကုလားလူးရွာ၊ ရှားလွင်ကျေးရွာများကိုလည်း မီးရှို့ဖျက်ဆီးနေကြောင်း ဒေသခံများက ပြောသည်။

“လက်ရှိ နေအပူချိန်ကြောင့်ရယ်၊ တစ်အိမ်ချင်းမီးတင်နေတာတွေကြောင့်ရယ် ရွာလုံးကျွတ်နီးပါးပျက်စီးသွားဖို့ရှိတယ်”ဟု ခင်ဦးမြို့နယ်သတင်းမှန်ပြန်ကြားရေးက ရေးသားသည်။

Public Service Announcement

ခင်ဦးမြို့နယ်တွင် မတ်လ ဒုတိယပတ်အတွင်းအကြမ်းဖက်စစ်ကောင်စီတပ်၏ မီးရှိူ့ဖျက်ဆီးမှုကြောင့် ကျေးရွာငါးရွာက အိမ်​ခြေ ၁၀၀ကျော်မီးလောင်ကျွမ်းပျက်စီးခဲ့ပြီး ပြည်သူ ၃ ဦး၊ ပြည်သူ့ကာကွယ်ရေးအဖွဲ့ဝင် ၁၅ ဦးအား သတ်ဖြတ်သွားခဲ့ကြောင်း ခင်ဦးမြို့နယ်သတင်းမှန်ပြန်ကြားရေးက သတင်းထုတ်ပြန်ထားသည်။