လေးကေကော်မြို့က နေအိမ်တချို့ကို စစ်ကောင်စီတပ်က မီးရှို့ဖျက်ဆီးတဲ့အပြင် ပစ္စည်းတွေကိုခိုးယူကြတာတွေရှိတယ်လို့ လေးကေကော်လူငယ်ကွန်ရက်က ထုတ်ပြန်ထားပါတယ်။
ကေအဲန်ယူ ဒူးပလာယာခရိုင် တပ်မဟာ ၆ နယ်မြေထဲမှာရှိတဲ့ လေးကေကော်မြို့သစ်ထဲကို ပြီးခဲ့တဲ့ နှစ်ကုန်ပိုင်းက စစ်ကောင်စီတပ်တွေက စစ်ရေးလှုပ်ရှားမှုတွေပြုလုပ်ခဲ့ပြီး ဒီကနေ့အချိန်ထိ ဆက်လက်တပ်စွဲနေရာယူထားဆဲဖြစ်ကာ နေအိမ်တွေအချို့ကို မီးရှို့ဖျက်ဆီးတာနဲ့ ပစ္စည်းတွေကို ခိုးယူဆောင်သွားခဲ့တာပါ။
“ဖျက်လိုဖျက်ဆီး ရှိတဲ့ပစ္စည်းတွေလည်း အကုန်ယူတယ်။ လေးကေကော်က အိမ်တွေလည်း အခွံတွေပဲကျန်တော့တယ်။ အိမ်ဆိုလည်း ဖျက်ဆီးထားတာ မြင်မကောင်းဘူး။ တန်ဖိုးကြီးတာ အကုန်ယူသွားတယ်”လို့ စစ်ဘေးရှောင်နေရတဲ့ လေးကေကော်ဒေသခံတွေက ပြောကြပါတယ်။
သုံးလတာကြာမြင့်နေပြီဖြစ်တဲ့ လေးကေကော်တိုက်ပွဲဟာ ဒီကနေ့အချိန်ထိ စစ်ရေးတင်းမာနေဆဲပဲဖြစ်သလို တိုက်ပွဲကြောင့်စစ်ရှောင်နေရတဲ့ လေးကေကော်ဒေသခံပြည်သူတွေဟာ လက်ရှိအချိန် နေရပ်ကိုမပြန်နိုင်သေးပဲ နီးစပ်ရာကျေးရွာတွေနဲ့ ထိုင်း-မြန်မာနယ်စပ် သောင်ရင်းမြစ်ကမ်းနံဘေးပေါ်မှာ ယာယီခိုလှုံနေထိုင်ရကာ အကူအညီတွေလိုအပ်ချက်ရှိနေတယ်လို့ သိရပါတယ်။
စစ်ကောင်စီဟာ အပစ်ရပ်ထားတယ်လို့ ထုတ်ပြန်ကြေငြာထားပေမယ့် ကေအဲန်ယူထိန်းချုပ်နယ်မြေတွေထဲကို စစ်ရေးပိုမိုပြုလုပ်နေတဲ့အပြင် တပ်မဟာ ၆ နယ်မြေဖြစ်တဲ့ ကော့ကရိတ်တောင်ပိုင်းဒေသထဲက ကျေးရွာတွေမှာလည်း ဝင်ရောက်တပ်စွဲနေရာယူထားပြီး ရွာတွေထဲက စစ်ရှောင်ပြည်သူတွေရဲ့ နေအိမ်တွေကို ဖျက်ဆီးတဲ့အပြင် ပစ္စည်းတွေကိုခိုးယူသွားတာတွေ ပြုလုပ်ခဲ့သေးတာပါ။
ကေအဲန်ယူ ဒူးပလာယာခရိုင် တပ်မဟာ ၆ နယ်မြေထဲကနေ စစ်ကောင်စီတပ်တွေအနေနဲ့ ပြန်လည်ရုတ်သိမ်းပေးဖို့ တပ်မဟာ ၆ က စစ်ကောင်စီထံစာပေးပို့အကြောင်းကြားပြီးနောက်ပိုင်း လေးကေကော်အပါအဝင် ကြာအင်းဆိပ်ကြီး ကော့ကရိတ်မြို့ပေါ်တွေနဲ့ မြ၀တီ-ကော့ကရိတ်အာရှလမ်းတွေမှာ နှစ်ဖက်တိုက်ပွဲတွေဖြစ်ပွားနေပြီး စစ်ရေးတင်းမာတာတွေ ပိုမိုဖြစ်ပွားလာနေတာဖြစ်ပါတယ်။