စစ်အာဏာသိမ်းယူထားသည့် ကြားကာလတွင် အလုပ်သမားရေးရာ နစ်နာမှု အချက်အလက် ကောက်ယူရေးနှင့် တိုင်ကြားမှုယန္တရားကို အကောင်အထည် ဖော်မည်ဟု အမျိုးသားညီညွတ်ရေးအစိုးရ (NUG)အလုပ်သမားဝန်ကြီးဌာနက ယနေ့ထုတ်ပြန်သည်။
စစ်အာဏာရှင်လက်အောက်တွင် ထိခိုက်နစ်နာဆုံးရှုံးနေသော အလုပ်ရှင်၊ အလုပ်သမားတို့၏ ဥပဒေပါ ရပိုင်ခွင့်နှင့် အကျိုးခံစားခွင့်များရရှိရန်၊ အလုပ်သမားရေးပြဿနာများနှင့် လုပ်ငန်းခွင် ဘေးအန္တရာယ်ကင်းရှင်းရေး၊ ကျန်းမာရေးဆိုင်ရာ ကိစ္စရပ်များကို ညှိနှိုင်းဖြေရှင်း ဆောင်ရွက် ပေးနိုင်ရေး အတွက် ခိုင်မာအားကောင်းသည့် အလုပ်ရှင်၊ အလုပ်သမားဆက်ဆံရေး တည်ဆောက်နိုင်ရန်နှင့် လုပ်ငန်းများအဆင်ပြေချောမွေ့စွာလည်ပတ်နိုင်စေရန် ရည်ရွယ်လုပ် ဆောင်ခြင်း ဖြစ်ကြောင်း NUG ကဆိုသည်။
အဆိုပါ တိုင်ကြားမှုယန္တရားလည်ပတ်ဆောင်ရွက်နိုင်ရေးအတွက် အလုပ်ရှင်များ၊ အလုပ်ရှင် အဖွဲ့ အစည်းများ၊ အလုပ်သမားအဖွဲ့အစည်းများနှင့် အလုပ်သမားရေးရာ ဆောင်ရွက်နေသူများ က ပူးပေါင်းပါဝင်ကြရန် NUGက မေတ္တာရပ်ခံထားသည်။
ထို့အပြင် ပူးပေါင်းပါဝင်ဆောင်ရွက်သည့် အဖွဲ့အစည်းများနှင့် လူပုဂ္ဂိုလ်တို့အား NUG က မှတ်တမ်းတင်ထားရှိကာ နိုင်ငံတော်တာဝန်များရယူချိန်တွင် ထိုက်တန်သည့် ဂုဏ်ပြုမှုများ ဆောင်ရွက် သွားမည်ဟု အလုပ်သမားဝန်ကြီး ဌာနက ထုတ်ပြန်သည်။
Public Service Announcement
