မကွေးတိုင်း ပွင့်ဖြူမြို့နယ်တွင် ကင်းလှည့်နေသည့် စစ်ကောင်စီတပ်ကို ပြည်သူ့ကာကွယ်ရေးတပ် (PDF)ပူးပေါင်းအဖွဲ့က တိုက်ခိုက်၍ စစ်ကောင်စီတပ်ဖွဲ့ဝင်များသေဆုံးထိခိုက်မှုရှိခဲ့ကြောင်း ပွင့်ဖြူဒေသခံတစ်ဦးက ပြောသည်။
“ညတုန်းက ပွင့်ဖြူမှာ ထိတွေ့တိုက်ပွဲ မိနစ် ၂၀ လောက် ဖြစ်တယ်။ ဖြစ်စဉ်က ည ၁၀နာရီဝန်းကျင်မှာ လှည့်ကင်းလှည့်နေတဲ့ စစ်ကောင်စီတပ်တွေနဲ့ ပွင့်ဖြူ PDFနဲ့ပေါ့ တော်လှန်ရေးအဖွဲ့တွေ ပူးပေါင်းပြီးတော့ပေါ့ ထိတွေ့တိုက်ပွဲဖြစ်ခဲ့တယ်။ သူတို့ ကင်းလှည့်တာသိလို့ ဒီအဖွဲ့တွေက အသံမိုင်းပေးပြီး ခေါ်လိုက်တာ။ ဒီအသံကြားလို့လာတဲ့ အချိန်မှာ ပစ်ခတ်မှုတွေဖြစ်ပြီး သူတို့ဘက်က သုံးယောက် ကျဆုံးသွားတယ်။ ဒဏ်ရာရသူတွေလည်းရှိမှာပေါ့”ဟု ၎င်းက ဆိုသည်။
အဆိုပါဖြစ်စဉ်နှင့်ပတ်သက်၍ ပွင့်ဖြူ PDFက လည်းသတင်းထုတ်ပြန်ခဲ့ရာ ပွင့်ဖြူမြို့နယ် အနောက်လေးအိမ်နှင့် မကြီးစုကျေးရွာ တစ်ဝိုက်တွင် ကင်းလှည့်နေသည့် စစ်ကောင်စီလက်အောက် ခံ စစ်သားနှင့် ရဲများကို ပွင့်ဖြူ PDFနှင့် အနောက်ပိုင်းတိုင်း မြေအောက်စစ်ဆင်ရေး စစ်ကြောင်း -၃တို့ ပူးပေါင်း၍ မတ်လ ၁၈ရက်က တိုက်ခိုက်ခဲ့ရာ စစ်ကောင်စီတပ်မှသုံးဦး သေဆုံးခဲ့သည်ဟု ဖော်ပြ သည်။
ပြည်သူများအနေဖြင့် စစ်ကောင်စီယန္တရားနှင့် သက်နိုင်သမျှ ဝေးဝေးနေကြရန်နှင့် စစ်ကား၊ ရဲကားများနှင့် ကပ်မလိုက်ရန် ပွင့်ဖြူ PDFက အသိပေးထား သည်။
Public Service Announcement
