မကွေးတိုင်း၊ပခုက္ကူမြို့နယ်တွင်စစ်တပ်ပိုင်ထုတ်ကုန်များရောင်းဝယ်ဖောက်ကားနေသောဆိုင်များအား၇ရက်အတွင်းရပ်ဆိုင်းကြရန် ပခုက္ကူအခြေစိုက် Young Force(UG)က သတိပေးသည်။
ပခုက္ကူအခြေစိုက် Young Force(UG)ကမကွေးတိုင်း၊ ပခုက္ကူမြို့နယ်တွင် စစ်တပ်ပိုင်ထုတ်ကုန်များ ရောင်းချလျက်ရှိသောဆိုင်ပိုင်ရှင်များအားယမန်နေ့မတ်လ ၁၉ ရက်နေ့က နောက်ဆုံးအကြိမ်အဖြစ်သတိပေးစာထုတ်ပြန်ခဲ့သည်။
အဆိုပါထုတ်ပြန်ချက်တွင် ပခုက္ကူမြို့နယ်တွင်း၌ စပ်တပ်ပိုင်ထုတ်ကုန်များအား မရောင်းချရန်၊ နယ်မြေခံအဖွဲ့အစည်းအသီးသီးမှသက်ညှာ၍ သတိပေးတားမြစ်ထားသော်လည်း ဆက်လက်ရောင်းချနေခြင်းများအား တွေ့ရှိနေရကြောင်း၊ Myanmar Beer၊ Mytel(bonus card) အပါအဝင် အခြားဆက်စပ်ပစ္စည်းများ ရောင်းချနေသော ဆိုင်များအား စာရင်းပြုစု၍ တည်နေရာများအတည်ပြုရရှိပြီး ဖြစ်ပြီး ၎င်းပစ္စည်းများအား ဆက်လက်မရောင်းချရန်(၇) ရက် အချိန်ပေးမည်ဖြစ်ကြောင်း၊ တစ်ပတ်ပြည့်မြောက်သည်နှင့်အဖွဲ့ဝင်များမှ ရှောင်တခင် စစ်ဆေးမှုများ ပြုလုပ်ပြီးစစ်တပ်ထုတ်ကုန်များ တွေ့ရှိပါက ဖျက်ဆီးခြင်း၊သိမ်းယူခြင်း အပြင် အခြားနည်းလမ်းများပါ လုပ်ဆောင်သွားမည်ဖြစ်ကြောင်း၊ စစ်ဆေးရာတွင် ကြည်ဖြူစွာလက်မခံဘဲ အဖွဲ့ဝင်များပေါ်လုပ်ငန်းနှောင့်နှေးစေသော အပြုအမူများ၊စစ်ကောင်စီထံသို့ သတင်းပေးတိုင်ကြားခြင်းများ ပြုလုပ်ပါက ပြင်းပြင်းထန်ထန် အရေးယူခြင်း၊ဖမ်းဆီး၍ နောင်ကျဥ်သည်အထိ အပြစ်ဒဏ်ခံယူစေမည် ဖြစ်ကြောင်း ရေးသားထားသည်။
အဆိုပါထုတ်ပြန်ချက်သည် လက်လီရောင်းချနေသောဆိုင်ငယ်များမှ လက္ကားဖြန့်ဖြူးနေသောဆိုင်ကြီးများအထိအကျုံးဝင်သည်ဟု Young Force(UG)ကအသိပေးသည်။
“အပြောနှင့်အလုပ်မညီဘူးထင်ပါက ဆက်လက်ရောင်းချလို့ရပါသည်။ (၇) ရက် ပြည့်ပါက ထိုဆိုင်များအား နမူနာအနေဖြင့် အတုယူနိုင်ရန် ဖောက်ခွဲဖျက်စီးသွားပါမည်။တော်လှန်ရေးမှာလူရင်း၊လူဖျားတွေမရှိပါ။တပ်ပိုင်ပစ္စည်းများရောင်းချပြီးလာရောက်ထောက်ပံ့သောအကူညီများကိုလည်းကျွန်
တော်တို့ အနေဖြင့် (လုံးဝ) လက်ခံမည်မဟုတ်ပါ။”ဟုYoung Force(UG)၏ထုတ်ပြန်ချက်တွင်ဖော်ပြထားသည်။
နယ်ဒေသအသီးသီးတွင် စစ်တပ်ထုတ်ကုန်များအားမရောင်းချရန် ဒေသတွင်း PDFများက သတိပေးလျက်ရှိပြီး နယ်အချို့တွင် စစ်တပ်ထုတ်ကုန်မြန်မာဘီယာရောင်းချနေသော ဘီယာဆိုင်များအား ဗုံးဖောက်သတိပေးခြင်း၊ စစ်တပ်ထုတ်ကုန်များအားသိမ်းဆည်းဖျက်ဆီးခြင်းများပြုလုပ်နေသည်။