ကရင်အမျိုးသားအစည်းအရုံး(KNU) တပ်မဟာ(၁)နယ်မြေ သထုံမြို့နယ်ရှိ စစ်ကောင်စီတပ် စခန်း နှစ်ခုကို သွားရောက်ပစ်ခတ်တိုက်ခိုက်ခဲ့ကြောင်း သထုံပြည်သူ့ကာကွယ်ရေး တပ်ဖွဲ့ (PDF)က ယနေ့ သတင်းထုတ်ပြန်သည်။
မတ်လ ၂၁ရက် ညပိုင်းက စစ်ကောင်စီတပ်၏ တပ်မ (၄၄) လက်အောက်ခံ ခမရ(၉) အထိုင်တပ်ရင်း၊ ဝင်းပနှင့် ခမရ(၉) ရှေ့တန်း ဝီယော်တပ်စခန်းတို့ကို KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA)နှင့် သထုံ PDF ပူးပေါင်း တပ်ဖွဲ့က ၄၀ မမ ဗုံးသီးလောင်ချာနှင့် သွားရောက် ပစ်ခတ်ခဲ့ခြင်းဖြစ်သည်ဟု ဖော်ပြထားသည်။
ထိုသို့ ပစ်ခတ်တိုက်ခိုက်မှုကြောင့် စစ်ကောင်စီတပ်မှ တပ်ခွဲမှူး တစ်ဦးထိခိုက် ဒဏ်ရာရရှိခဲ့ ကာအခြားထိခိုက်သေဆုံးမှု ရှိ၊မရှိကို အတည်မပြုနိုင်သေးဟု ဆိုသည်။
စစ်ကောင်စီတပ်ကလည်း လက်နက်ကြီး လက်နက်ငယ်များဖြင့် ပြန်လည် ပစ်ခတ်ခဲ့ရာ နှစ်ဖက်အပြန်အလှန် ပစ်ခတ်မှု ဖြစ်ပွားခဲ့ပြီး KNLA/PDF ပူးပေါင်းတပ်ဖွဲ့မှ ထိခိုက်မှုမရှိဘဲ ပြန်လည်ဆုတ်ခွာနိုင်ခဲ့သည်ဟု ထုတ်ပြန်ခဲ့သည်။
Public Service Announcement
အဆိုပါ တိုက်ပွဲမဖြစ်ပွားမီ မတ်လ ၁၉ရက်က ခမရ(၉) ဝီယောက်စခန်းမှ လက်နက်ကြီး များဖြင့် ပစ်ခတ်ခဲ့၍ သထုံမြို့နယ် ကျောက်တောင်ကျေးရွာ ဘုရားပွဲသို့ ကျရောက်ပေါက်ကွဲပြီး ကလေးငယ်တစ်ဦးနှင့် အမျီုးသမီး နှစ်ဦး သေဆုံးကာ ရှစ်ဦး ဒဏ်ရာရရှိခဲ့သည်။ အဆိုပါ တပ်စခန်းကို KNLA/PDF ပူးပေါင်းအဖွဲ့မှ မတ်လ ၂၁ရက်တွင် သွားရောက် တိုက်ခိုက်ခဲ့ခြင်း ဖြစ်သည်။
