ဖက်ဆစ်စစ်တပ်နှင့်ဆက်စပ်ပတ်သက်မှုများအား ချက်ချင်းရပ်တန့်ရန် BIMSTEC အဖွဲ့ဝင်နိုင်ငံ များကို ပြည်တွင်း၊ ပြည်ပအဖွဲ့အစည်း ၁၃၆ ဖွဲ့က တောင်းဆိုကြောင်း India For Myanmar က ထုတ်ပြန်သည်။
ယခုလကုန်တွင် သီရီလင်္ကာ၌ ကျင်းပမည့် (၅)ကြိမ်မြောက် BIMSTEC ထိပ်သီးညီလာခံသို့ အကြမ်းဖက်စစ်ကောင်စီခေါင်းဆောင် တက်ရောက်ရန်ဖိတ်ကြားထားမှုကို ဒေသတွင်း သပိတ်အင်အားစုများ၊ အရပ်ဘက်အဖွဲ့အစည်းများ၊ ဒီမိုကရေစီအရေးလှုပ်ရှားသူများက ကန့်ကွက်ခြင်းဖြစ်ပြီး ယင်းကန့်ကွက်စာကို အိန္ဒိယဝန်ကြီးချုပ် မိုဒီနှင့် အဖွဲ့ဝင်သံရုံးများကို အိတ်ဖွင့်ပေးစာပေးပို့ ခဲ့သည်။
အိတ်ဖွင့်ပေးစာတွင် ဖက်ဆစ်စစ်တပ်နှင့်ဆက်စပ်ပတ်သက်မှုကို ရပ်တန်းကရပ်ရန်၊ မြန်မာပြည် ဒီမိုကရေစီအရေးလှုပ်ရှားမှုကြီး၏ တောင်းဆိုချက်များကို အလေးထားရန်နှင့် လာမည့်ထိပ်သီးညီလာခံ၌ မြန်မာပြည်အရေးအား လူသားဂုဏ်သိက္ခာနှင့် လူသားမျိုးနွယ်တို့၏ အရေးကို ရှေးရှုဆွေးနွေးကြရန် တောင်းဆိုထားသည်။
ဖက်ဆစ်စစ်တပ်ကို အစိုးရအဖြစ် အသိအမှတ်ပြုသည့် မည်သည့် နိုင်ငံတကာအဖွဲ့အစည်း၊ နိုင်ငံ ဖြစ်စေ ဒီမိုကရေစီလိုလားသည့် ပြည်သူများနှင့် လူ့အခွင့်အရေး၊ ဒီမိုကရေစီအရေး အလေးထားသည့် နိုင်ငံတကာအသိုင်းအဝိုင်း၏ပြင်းထန်သော ဆန့်ကျင်မှုများနှင့် ရင်ဆိုင်ရမည်ဟုလည်း သတိပေးထားသည်။
BIMSTEC အနေဖြင့်လည်း ဖက်ဆစ်စစ်တပ်အား မြန်မာအစိုးရ ကိုယ်စားလှယ်အဖြစ် ဖိတ်ခေါ်ခြင်းကို ရပ်တန့်မှုမရှိပါက India For Myanmarက နည်းမျိုးစုံဖြင့် ဆက်လက်ကန့်ကွက်သွားမည်ဖြစ်ကြောင်း ထုတ်ပြန်သည်။
(India4Myanmar တက်ကြွလှုပ်ရှားသူများသည် နယူးဒေလီအခြေစိုက် ဘင်းစတပ် အဖွဲ့နိုင်ငံများ၏ သံရုံးများသို့ ယနေ့ ထုတ်ပြန်ခဲ့သည့်အဖွဲ့အစည်း ၁၃၆ဖွဲ့၏ တိုက်တွန်းနှိုးဆော်ချက် အိတ်ဖွင့်ပေးစာအား ပေးပို့ခဲ့သည်။)