စစ်ကိုင်းတိုင်း ကလေးမြို့ပေါ်တွင် ယနေ့(မတ် ၂၈ ရက်)ည၈နာရီမှ စတင်ပြီး ပေါက်ကွဲသံများ ဆက်တိုက်ကြားနေရသည်ဟု ဒေသခံများက ပြောသည်။
ယနေ့သည် စစ်အာဏာရှင်ဆန့်ကျင်ရေးတွင် နာမည်ကျော်သော ကလေးမြို့ရှိ တာဟန်း သပိတ်ခံတပ် ဖြိုခွင်းခံရပြီး စစ်ကောင်စီတပ်က ပြည်သူငါးဦးကို ရက်ရက် စက်စက်ပစ်သတ် ခဲ့သည့် တစ်နှစ်ပြည့်အထိမ်းအမှတ်နေ့လည်း ဖြစ်သည်။
“ဒီည ကလေးမြို့ထဲးမှာ ဗျောက်အိုးတွေတစ်ညလုံး ခွဲပေးပါမယ်ဗျ။ ပြည်သူများ မလိုအပ်ပဲ။ အိမ်ပြင်မထွက်ကြဖို့ သတိပေးအပ်ပါသည်”ဟု ကလေးမြို့ပြည်သူ့ကာကွယ်ရေးတပ်၊ တပ်ရင်း-၁ မှ တပ်သားတစ်ဦးက ၎င်း၏လူမူကွန်ရက်မှတစ်ဆင့် သတိပေးထားသည်။
ပေါက်ကွဲသံများကို ၈နာရီခန့်တွင် ဆက်တိုက်ကြားနေရပြီး ၈နာရီခွဲခန့်တွင် ခေတ္တပြန်လည် ငြိမ်သက်သွားသည်ဟု ကလေးမြို့ခံတစ်ဦးက ပြောသည်။
Public Service Announcement
“ကလေးမြို့အနောက်ဘက်မှာ ၈နာရီခွဲလောက်မှ ခဏငြိမ်သွားတယ်။ ကျွန်တော်တို့က PDFကလေးတွေကိုပဲ စိတ်ပူပါတယ်။”ဟု ကလေးမြို့ခံ တစ်ဦးက ပြောသည်။
PDFများ၏ ဖောက်ခွဲတိုက်ခိုက်မူများကြောင့် ကလေးမြို့အခြေစိုက်တပ်ရင်း များအတွင်း ကြောက်လန့်နေကြသည်ဟု တပ်မိသားစုတစ်ဦးကလည်း ပြောသည်။
“ကလေး ဒကစ (ဒေသ ကွပ်ကဲ မှု စစ် ဌာန ချုပ်)ထဲမှာကြောက်လန့်နေကြတယ်။ တပ်ရင်းတွေကို PDFတွေလာတိုက်မှာကို အဓိကလန့်နေကြတယ်”ဟု ၎င်းက ဆိုသည်။
ကလေးမြို့ပေါ်ရှိ စစ်ကောင်စီလက်အောက်ခံ ဌာနဆိုင်ရာရုံးများတွင် ပေါက်ကွဲမူများ ဆက်တိုက်ဖြစ်ပေါ်နေပြီး ပေါက်ကွဲမူများကို ၉နာရီခန့်က ကြားခဲရသေးသည်ဟု အခြား ကလေးမြို့ခံတစ်ဦးက ပြောသည်။
စစ်တပ်အာဏာသိမ်းပြီးနောက် လက်နက်ကိုင်ခုခံမူများထဲတွင် ကလေးမြို့တာဟန်းရပ်ကွက်ရှိ သပိတ်ခံတပ်သည် အထင်ရှားဆုံးဖြစ်သည်။
ထိုခံတပ်ကို အကြမ်းဖက်စစ်တပ်က အင်အားအလွန်ကျွံသုံးပြီး လက်နက်ကြီး၊လက်နက်ငယ် များ ၂၀၂၁ မတ် ၂၈ ရက်နှင့် ဧပြီ ၇ရက်တွင် ပစ်ခတ်ဖြိုခွင်းခဲ့ သည်။ ထိုကြောင့် ဆန္ဒပြသူများဘက်မှ အနည်းဆုံး ၁၈ဦးသေဆုံးပြီး ဖမ်းဆီးခံရသူနှင့် ဒဏ်ရာရရှိသူ အမြောက်အမြားရှိခဲ့သည်။
