စစ်ကိုင်းတိုင်း ချောင်းဦးမြို့နယ်မှ စစ်အာဏာရှင်ဆန့်ကျင်ရေးသပိတ်ခေါင်းဆောင် ကိုမာန်ဇာမြေမွန်ကို အကြမ်းဖက်စစ်ကောင်စီက မတရားဖမ်းဆီးပြီး ကိုးလအကြာတွင်ထောင်ဒဏ် ၂ နှစ်ချမှတ်လိုက်သည်။
မုံရွာအကျဥ်းထောင်အတွင်း ထိန်းသိမ်းခံထားရသည့်ကိုမာန်ဇာမြေမွန်အား စစ်ကောင်စီက ပုဒ်မ ၅၀၅(က)ဖြင့် ယနေ့(မတ်လ ၃၀) အမိန့်ချလိုက်ခြင်းဖြစ်သည်။
“အဖမ်းခံရတာက မနှစ်က(၂၀၂၁) ဇွန်လထဲမှာ။ ဖမ်းတုန်းကလည်း အကြမ်းဖက်ဖမ်းသလို စစ်ကြောရေးမှာလည်း တော်တော် နှိပ်စက်ခံခဲ့ရတယ်”ဟု ကိုမာန်ဇာမြေမွန်၏ မိတ်ဆွေတစ်ဦးက ပြောသည်။
ကိုမာန်ဇာမြေမွန်ကို ၂၀၂၁ ဇွန်လ ၈ရက်တွင် စစ်ကောင် စီက ဖမ်းဆီးခဲ့ခြင်းဖြစ်သည်။ ပုဒ်မ ၅၀၅ (က) အပါအဝင် ပုဒ်မငါးခုဖြင့် မတရားအမှုဖွင့်ထားပြီး ယခုအခါ တစ်မှုအတွက်သာ အမိန့်ချခြင်းဖြစ်သည်။
Public Service Announcement
နောက်ထပ် လေးမှုအတွက် ဆက်လက်အမှုရင်ဆိုင်ရအုံးမည်ဖြစ်သည်။
ချောင်းဦးမြို့နယ်သည် စစ်အာဏာရှင်ဆန့်ကျင်ရေးတွင် အင်အားကောင်းပြီး လူညီသည့်မြို့ဖြစ်သည်။
ကိုမာန်ဇာမြေမွန်၏ သူငယ်ချင်းဖြစ်သူ ချောင်းဦးမြို့နယ် တွဲဘက်တရားသူကြီး ဦးကောင်းမြတ်သူသည် စစ်တပ်အား အာဏာဖီဆန်ကာ CDM ပြုလုပ်ခဲ့ပြီး ယခုအခါ အမျိုးသားညီညွတ်ရေးအစိုးရတရားရေးဝန်ကြီးဌာနတွင် တာဝန်ထမ်းဆောင်နေသည်။
