မူဆယ်မြို့တွင် စစ်ကောင်စီလက်အောက်ခံ ရဲတပ်ဖွဲ့ဝင်ငါးဦးကို လက်နက်ကိုင်တစ်ဖွဲ့က ဖမ်းဆီးသတ်ဖြတ်လိုက်ပြီး ရုပ်အလောင်းများကို လမ်းဘေးတွင် ပစ်ထားခဲ့သည်ဟု ဒေသခံများက ပြောသည်။
မူဆယ်မြို့မရဲစခန်းမှ ရဲအုပ်ဝင်းကို အပါအဝင် ရဲတပ်ဖွဲ့ဝင်ငါးဦးကို လက်နက်ကိုင်တစ်ဖွဲ့က ယမန်နေ့( မတ်လ ၃၀ ရက်)ညတွင် ဖမ်းဆီးခေါ်ဆောင်သွားခြင်းဖြစ်သည်။
မူဆယ်မြို့ ကျင်စန်းကျော့လမ်း(တရုတ်နယ်စပ်ဂိတ်သို့သွားရာလမ်း)တွင် ဖမ်းဆီးသွားခြင်းဖြစ်ပြီး သတ်ဖြတ်ခံထားရသည့် ရုပ်အလောင်းများကို မူဆယ်-ကြုကုတ်လမ်းရှိ မုံးပေါ်ရွာလမ်းဘေးတွင် ပစ်ထားသည်ကို တွေ့ရသည်ဟု ဒေသခံများက ပြောသည်။
“ဒီဒေသမှာ ရဲတွေက အရာရှိပိုင်းတွေအတွက် ငွေရ ပေါက်သိပ်များတယ်။ အောက်ခြေရဲတွေကတော့ စုတ်စုတ်ပဲ့ပဲ့တွေများတယ်။ လက်နက်ကိုင်တွေနဲ့တွေ့ရင် ခံရတာပဲ။ အခုလည်း လမ်းဘေးမှာ မြင်မကောင်းဘူး”ဟု ဒေသခံတစ်ဦးက ပြောသည်။
Public Service Announcement
အသတ်ခံရသည့် ရဲငါးဦးတွင် ရဲအုပ်တစ်ဦးပါဝင်ကြောင်း People’s Spring က အတည်ပြုနိုင်ပြီး ကျန်လေးဦးကို မသိရသေးပေ။ ရုပ်အလောင်းများကို စစ်ကောင်စီက ယနေ့ နေ့လယ်ပိုင်းတွင် သယ်ယူသွားပြီဖြစ်သည်။
အထက်ပါ ဖြစ်ရပ်နှင့်ပတ်သက်၍ မည်သည့်အဖွဲ့ က ပြုလုပ်သည်ကို ယနေ့ညအထိ သတင်းထုတ်ပြန်ခြင်း မတွေ့ရသေးပေ။
