ကေအဲန်ယူထိန်းချုပ်နယ်မြေ ဖာပွန်ခရိုင်မှာရှိတဲ့ စစ်ကောင်စီရဲ့တပ်စခန်းတွေကို ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၅ က ဝင်ရောက်တိုက်ခိုက်ခဲ့ရာ စစ်ကောင်စီဘက်က နှစ်ဦးသေဆုံးသွားခဲ့ပြီး ထိခိုက်ဒဏ်ရာရရှိတာတွေရှိနေတယ်လို့ မူတြော်သတင်းစဉ်က ထုတ်ပြန်ပါတယ်။
မနေ့ ဧပြီ ၁ ရက် မနက် ၆ နာရီအချိန်က ဖာပွန်ခရိုင်ထဲမှာရှိတဲ့ ခေါပုတ်စခန်းကို KNLA တပ်မဟာ ၅ လက်အောက်ခံ တပ်ရင်း ၁၅ တပ်ဖွဲ့ဝင်တွေက ဝင်ရောက်တိုက်ခိုက်ရာ စစ်ကောင်စီဘက်က တစ်ဦးသေဆုံးသွားခဲ့တယ်လို့ ထုတ်ပြန်ချက်မှာဖော်ပြထားပါတယ်။
ပြီးခဲ့တဲ့ မတ်လ ၃၁ ရက်မနက် ၈ နာအချိန်နဲ့ မနက် ၁၁ နာရီအချိန်က ဖာပွန်မြို့ပေါ်မှာရှိတဲ့ စစ်ကောင်စီရဲ့ (၄၃၄) တပ်စခန်းကို နှစ်ကြိမ်တိုင်တိုင် တိုက်ခိုက်ခဲ့သလို မနက် ၉ နာရီအချိန်ကလည်း ကူးဆိပ်စခန်းကို ဝင်ရောက်တိုက်ခိုက်ခဲ့ရာ ဒီတိုက်ခိုက်မှုသုံးကြိမ်အတွင်း စစ်ကောင်စီဘက်က တစ်ဦးသေဆုံးပြီး တစ်ဦးဒဏ်ရာရရှိသွားခဲ့တာလို့ ထုတ်ပြန်ချက်မှာ ပါရှိပါတယ်။
ဒါ့အပြင် မတ်လ ၃၁ ရက်မနက်က ကမမောင်းမြိုကနေ ကတိုင်တိဒေသဘက်ကို တပ်ပြောင်းလာတဲ့ စစ်ကောင်စီတပ်ရဲ့ ကားကို ကြားဖြတ်တိုက်ခိုက်ခဲ့ပြီး ညနေ ၃နာရီအချိန်မှာလည်း ထီးသဘလူကလိုးမှာရှိတဲ့ နယ်ခြားစောင့်တပ်BGF ကို နှစ်ကြိမ်တိုင်တိုင် ဝင်ရောက်ပစ်ခတ်သေးတယ်လို့ တပ်မဟာ ၅ က ဆိုပါသေးတယ်။
မနေ့ကလည်း ဖာပွန်အခြေစိုက် စစ်ကောင်စီရဲ့တပ်တွေဟာ ကလော်ထာကျေးရွာအုပ်စုအတွင်းမှာရှိတဲ့ ဒေဘောခေါ်၊ တိုသေဖူး၊ ကနဲဃောထာ၊ ဒူးပရက်ကျိုး၊ ထီးညာလိခီးနဲ့ ထိုလွီကျိုးကျေးရွာအတွင်းကို လက်နက်ကြီးအချက် ၂၀ ကျော်ပစ်ခတ်ခဲ့ပြီး ဒေသခံတွေ ထိခိုက်မှုမရှိဘူးလို့ မူတြော်သတင်းစဉ်ရဲ့ထုတ်ပြန်ထားချက်အရ သိရပါတယ်။